Ձեր վստահելի աղբյուրը

Վենետիկի 73-րդ կինոփառատոնի երեք միջազգային ժյուրիներն արդեն ձևավորվել են: «Կինոաշխարհ»-ի հաղորդմամբ, հիմնական մրցույթի ժյուրին գլխավորելու է բրիտանացի, «բոնդիանայի» վերջին երկու ֆիլմերի և «Գեղեցկություն ամերիկյան ձևով» կինոնկարի ռեժիսոր Սեմ Մենդեսը, ով աշխարհի այն վեց ռեժիսորներից մեկն է, ովքեր «Օսկար» են ստացել դեբյուտային կինոնկարի համար:

Փառատոնի «Հորիզոններ» բաժնի ժյուրիի նախագահն է ծագումով հայ ֆրանսիացի ռեժիսոր Ռոբեր Գետիկյանը, որը, ի դեպ, անցած տարի «Ոսկե ծիրան» երևանյան կինոփառատոնի հիմնական մրցույթի ժյուրիի նախագահն էր, և նրա «Մի խենթ պատմություն» ֆիլմով էլ բացվեց փառատոնը: «Հորիզոններում» ներկայացվում են այն ֆիլմերը, որոնք նոր միտումներ են բերում համաշխարհային կինեմատոգրաֆում:

«Հորիզոնների» ժյուրիի կազմում են ամերիկացի կինոքննադատ և կինոպատմաբան, կինոյի մասին 13 գրքերի հեղինակ Ջիմ Հոբերմանը, որի ձայնն ամենաազդեցիկներից է միջազգային կինոքննադատների շրջանում, եգիպտացի դերասանուհի, Կահիրեի և Արաբական կինոյի փառատոների մրցանակակիր Նելլի Քարիմը, իտալացի նշանավոր դերասանուհի Վալենտինա Լոդովինին, կորեացի դերասանուհի և ռեժիսոր Մուն Սո-Րին՝ առաջին կորեացի դերասանուհին, որ մրցանակ է ստացել Վենետիկի փառատոնում, իսպանացի կինոքննադատ և կինոգետ, 1989-ից ի վեր Մադրիդի իսպանական ֆիլմոտեկի տնօրեն, մի շարք միջազգային կինոփառատոների, այդ թվում և Կաննի և Լոկառնոյի ժյուրիների անդամ Խոսե Մարիա (Չեմա) Պրադոն և հնդիկ ռեժիսոր Չայթանյա Թամհանեն, որի դեբյուտային «Դատարան» ֆիլմը մրցանակ է ստացել Վենետիկի 71-րդ փառատոնում և ևս 32 միջազգային մրցանակներ:

Վենետիկի դեբյուտային ֆիլմի համար Լուիջի դե Լորենտիսի անվան մրցանակի՝ «Ապագայի առյուծի», ժյուրիի նախագահն է իտալացի դերասան, «Դավիդ դի Դոնաթելլոյի» մրցանակակիր Կիմ Ռոսսի Ստյուարտը:

Վենետիկի 73-րդ կինոփառատոնն անցկացվելու է օգոստոսի 31-ից սեպտեմբերի 10-ը:

Ռոբեր Գետիկյանը ծնվել է Մարսելում։ Հայրը հայ է, մայրը՝ գերմանուհի։ Ուսանել է Փարիզի համալսարանի սոցիալական գիտությունների ֆակուլտետում։ Կինոյում աշխատում է 1979 թվականից։ 2005 թվականին Հայաստանում նկարահանել է «Ճամփորդություն Հայաստանում» ֆիլմը: 2015 թ. հունիսի 3-ին ՀՀ Նախագահի հրամանագրով պարգևատրվել է Պատվո շքանշանով: