Ձեր վստահելի աղբյուրը

Այս գիշեր ՊՊԾ գնդի մոտ ոստիկանության և «Սասնա ծռեր» խմբի անդամների միջև տեղի ունեցած միջադեպի ժամանակ վիրավորված Աշոտ Պետրոսյանի և Հովհաննես Հարությունյանի վիճակը գնահատվում է միջին ծանրության: Այս մասին քիչ առաջ լրագրողների հետ զրույցում «Էրեբունի» ԲԿ-ի ինտենսիվ թերապիայի բաժանմունքի ղեկավար Հարություն Մանգոյանը՝ հավելելով, որ նրանք հիվանդանոց են տեղափոխվել գիշերը 2:50-ի սահմաններում:

Ըստ նրա՝  Աշոտ Պետրոսյանը ստացել է երկու ստորին վերջույթների հրազենային գնադակային վիրավորում և աջ ազդոսկրի կոտրվածք: Հովհաննես Հարությունյանը ստացել է աջ ազդոսկրի կույր հրազենային վնասվածք, աջ սրունքի միջանցիկ հրազենային վնասվածք՝  սրունքի ոսկրերի կոտրվածքով:

«Երկու վիրավորների համար անհապաղ կազմակերպվել են բոլոր անհրաժեշտ ախտորոշիչ միջոցառումներ, այդ թվում՝ բազմաօրգանային ԿՏ հետազոտություն, որից հետո տեղափոխվել են վիրասրահ, որտեղ կատարվել է վերքերի առաջնային վիրաբուժական մշակում: Դրանից հետո տուժածները նորից տեղափոխվել են վերակենդանացման բաժանմունք: Այս պահին նրանց վիճակը գնահատվում է միջին ծանրության կայուն, երկու վիրավորների գիտակցությունը տեղն է»,- ասաց Հարություն Մանգոյանը:

Նա նաև նշեց, որ տուժածները վերակենդանացման բաժանմունքում գտնվելը կտևի  կարճ, քանի որ նրանց վիճակը միջին ծանրության է և վերահսկելի:

Հիշեցնենք, որ հուլիսի 25-ի լույս 26-ի գիշերը Խորենացի փողոցում տեղի ունեցած միջադեպի հետևանքով հրազենային վիրավորում ստացած զինված խմբի երկու անդամ տեղափոխվել է «Էրեբունի» բժշկական կենտրոն։