Ձեր վստահելի աղբյուրը

Հերացու անվան բժշկական համալսարանում այսօր մի քանի հայտնի բժիշկներ անդրադարձան ՊՊԾ գնդի տարածք օգնության մեկնած բժիշկներին պատանդ պահելու փաստին:

«Նորք» ինֆեկցիոն հիվանդանոցի տնօրեն, Հայաստանի գլխավոր ինֆեկցիոնիստ Արա Ասոյանն ասաց՝ շատ հուզված է, դժվարանում է արտահայտվել:

«Փաստը, որի մասին մենք տեղեկացանք, ցնցել է ոչ միայն այս դահլիճը, այլև ողջ հանրապետությունը: Աշխարհում, կարծում եմ, նման երևույթ չկա: Որքան ես գիտեմ, որևէ պատերազմի, որևէ հեղափոխությա ժամանակ դեպք չի եղել, որ բուժաշխատողներին պատանդ վերցնեն: Եթե եղել է, անմիջապես ազատ են արձակվել: Պինոչետի հեղափոխության ժամանակ նույնիսկ մի բժշկի գլխից մի մազ չի պակասել: Ես զայրացած եմ, զարմացած: Դիմում եմ ՊՊԾ գունդը գրաված տղաներին:  Տղաներ, ձեր մի մասը ինձ շատ լավ ճանաչում է, ձեզ հայտնի պատճառներով, ձեր մի մասին էլ ես եմ շատ լավ ճանաչում: Ես խնդրում եմ՝ անհապաղ, նրանց բաց թողեք: Եթե պետք է, ես կգամ նրանց տեղը կնստեմ, բայց մեր բուժաշխատողներին՝ բժիշկներին, բուժքույրին, բաց թողեք: Սա հայ մարդուն հարիր չէ»,-ասաց նա: