Ձեր վստահելի աղբյուրը

«Շտապօգնություն» ՓԲԸ տնօրեն Թագուհի Ստեփանյանը վերջին անգամ 20 րոպե առաջ է խոսել ՊՊԾ գնդում պատանդ պահվող բժիշկների հետ: Խոսակցությունն ընդհատվել է:

«Զինված խմբի տղաներից մեկը վերցրեց հեռախոսն ու ասաց՝ այլևս չզանգեք»,-Panorama.am-ին ասաց Թ. Ստեփանյանը:

Մինչ այդ նրանք բժիշկներին բաց թողելու համար պահանջներ են ներկայացրել. «Ասացին բժիշկներին բաց կթողնենք այն դեպքում, երբ նախարարն անձամբ կներկայանա և այդ տարածքում կկազմակերպի վիրահատություններ»:

Ստեփանյանն իր հերթին զինված խմբի անդամներից խնդրել է՝ բաց թողնել իր անձնակազմի բժիշկներին, որովհետև նրանք ընդամենն այդ տարածք էին մտել վիրավորներին հիվանդանոց տեղափոխելու համար, ոնց արել էին մինչև այդ:

«Իրենք թույլ չեն տվել վիրավորներին տեղափոխել, շատ կտրուկ, խիստ ներկայացրել են իրենց պահանջները, ասել են՝ ոչ մի կապի դուրս մի եկեք ու կատարեք մեր պահանջները»,-ասաց «Շտապօգնության» տնօրենը:

Ստեփանյանի խոսքով, այդ տարածքում վիրահատություններ կատարելու հնարավորություն չկա. «Թեկուզ պատերազմական իրավիճակում ստեղծվում են դաշտային հոսպիտալներ, որ մարդկանց վիրահատեն ու ճիշտ բուժօգնություն ցուցաբերեն: Նման բան աշխարհում չկա, որ բժշկին վերցնեն, պահեն ու պահանջեն, որ մյուս բժիշկը գա:

«Շտապօգնություն» տնօրենի խոսքով, խմբի անդամներից հրազենային վնասվածքներ ունեն, մեկը ոտքի հատվածում:  Նա տուժածների անունները չգիտի:

«Ես գտնում եմ, որ սա անթույլատրելի իրավիճակ է, նման ձևով հարց չեն լուծում: Հիվանդին պետք է պրոֆեսիոնալ բուժօգնություն ցուցաբերվի, հիվանդն իրավունք  ունի ապրելու, այդ իրավունքը ոչ մեկ ոչ մեկից չի կարող զրկել»: