Ձեր վստահելի աղբյուրը

«Աստղիկ» ԲԿ-ի անհետաձգելի բուժօգնության և շտապօգնության ծառայությունների ղեկավար Մանուկ Յազչյանն անթույլատրելի քայլ է համարում ՊՊԾ գնդում վիրավորում ունեցող մարդկանց ու բժիշկներին պատանդ պահելը:

«Սա ոչ մարդկային ու ոչ բարոյական քայլ է:  Եթե մարդն ունի բուժօգնության կարիք, ո՞նց կարելի է նման կերպ վարվել նրա հետ»,-ասաց բժիշկը, ընդգծելով, որ վայրկյաններն  անգամ կարող են նշանակություն ունենալ մարդու կյանքի ու հետագա առողջության վրա:

Նա նշեց, հստակ տեղեկություններ չունի ՊՊԾ գնդի տարածքում գտնվող անձանց վնասվածքների բնույթի, վիրավորների վիճակի մասին, սակայն  երբեմն վայրկյանները կարող են վճռորոշ լինել:
Ինչ վերաբերում է բժիշկներին անազատության մեջ պահելուն, ապա Յազչյանը դա գնահատեց որպես ստորություն. «Ո՞նց կարելի է բժշկին պատանդ պահել: Եթե նա ամենանեղ պահին օգնության է շտապում մարդուն, ինչպե՞ս կարելի է նման կերպ վարվել»:

Ոստիկանությունն այսօր հայտարարեց. «ՊՊԾ գնդի տարածքում կա ևս երկու վիրավոր: Իրավապահները նրանց բուժօգնություն տրամադրելու կոչ էին արել և մերժում ստացել: Վիրավորներին բուժհաստատություն տեղափոխելու կոչ էին արել նաև հարազատները։ Իրավապահներն ապահովել էին բոլոր անհրաժեշտ պայմանները։ Իսկ երբ բժիշկները ժամանել են, նրանց պատանդ են վերցրել: Իրավապահները միջոցներ են ձեռնարկում պատանդված բժիշկներին բանակցությունների միջոցով ազատելու համար»: