Ձեր վստահելի աղբյուրը

«Շտապօգնություն» ՓԲԸ-ի տնօրեն Թագուհի Ստեփանյանն այսօր խոսել է ՊՊԾ գնդում գտնվող բուժաշխատողնեի հետ: Ի՞նչ է ասել նրան բժիշկի, ինչո՞ւ են հենց բուժակին բաց թողել, այս ու այլ հարցերի վերաբերյալ Panorama.am-ը զրուցել է Թ. Ստեփանյանի հետ:

Հիշեցնենք, որ այս պահին գնդի տարածքում են գտնվում բժիշկներ  Նորայր Թևանյանը, Սալվադոր Խեչոյանը, բուժքույր Մալինա Մարգարյանը: Բուժակ Դավիթ Տոնոյանն ազատ է արձակվել:

Հարց-Այսօր խոսե՞լ եք ՊՊԾ գնդում գտնվող բուժաշխատողների հետ: Ի՞նչ են փոխանցել:
Պատասխան- Այո, խոսել եմ, ոչինչ չեն փոխանցել, սպասում են:

Հարց-Լուրեր կան, որ նրանք իրենց կամքով են մնացել վիրավորներին օգնություն ցուցաբերելու համար:
Պատասխան-Ոչ, իրենք իրենց կամքով չեն մնացել: Այսինքն, ո՞նց իրենց աշխատանքն արել վերջացրել են, ասել են՝ կմնա՞նք այստեղ: Բա էդ ժամանակ եթե ես խոսում եմ զինված տղաների հետ, ինչո՞ւ են ինձ ասում, ոչ մի երկրորդ կարծիք լինել չի կարող, բժիշկները ոչ մի ձևով դուրս չեն գա: Եթե ես ասում եմ՝ կինը գոնե թող դուրս գա,  ինչի՞ են ինձ ասում, որ դրա մասին խոսք լինել չի կարող և այլևս մեզ հետ էդ բանակցությունները մի վարեք: Ձեզ ո՞նց է թվում, կինը կարող է ինքն իրենով որոշել, որ 24 ժամից ավել մնա այդտեղ, չգնա հասնի իր երեխաներին, բարեկամներին: Մի կողմ եմ դնում տղաներին:

Հարց- Բուժակին բաց են թողել, Դուք նրա հետ խոսել ե՞ք, ի՞նչ է պատմել, ինչո՞ւ հենց նրան ազատ արձակեցին:
Պատասխան- Այո, խոսել եմ, շատ չենք  մանրամասնել: Սթրեսի մեջ է, իր մոտ շատ լուրջ վիճակ է, ինձ թվում է, դրա համար էլ բաց են թողել: Հիմա տանն է:

Հարց-Այսօր, որ խոսեցիք ՊՊԾ գնդում գտնվողների հետ, ի՞նչ ասեցին:
Պատասխան-Ոչ մի բան չասաց, վիրակապերն էր փոխում:

Հարց-Ո՞ր ժամին եք խոսել, մասնավորապես ո՞ւմ հետ, ի՞նչ կապով:
Պատասխան- Ժամը 9:30, մեր ներքին հեռախոսն է, Սալվադորի հետ:

Հարց-Ասա՞ց, ուզում են դուրս գալ:
Պատասխան-Ո՞նց կարան չուզենան դուրս գալ, հեչ որ չէ, մի հատ նորմալ հաց ուտեն, լվացվեն, մարդկային պայմանների մեջ լինեն:

Հարց –Երեկ հեռուստաընկերություններից մեկը խոսել էր Սալվադորի հետ, դուք լսե՞լ եք, ի՞ր ձայնն էր:
Պատասխան-Հա, ի՞նչի, նման չէ՞ր:

Հարց-Ես չեմ ճանաչում նրան, չեմ կարող ասել:  Դուք տեղեկություններ ունե՞ք, ներսում գտնվողներից ո՞վ ի՞նչ վնասվածք ունի:
Պատասխան-Չէ, չգիտեմ հստակ: Գիտեմ, որ մեկն ունի հրազենային վնասվածք, մյուսի վնասվածքը հին էր: Երկու վիրավոր են: Մեր բժիշկները նրանց են սպասարկել երեկ: Չնայած, որ ասել էին, երեք վիրավոր կա:

Հարց-Փաստորեն թույլ չեն տալիս նաև վիրավորներին դուրս բերել,  ո՞նց եք գնահատում դա:
Պատասխան-Շատ բացասական, որովհետև յուրաքանչյուր մարդ իրավունք ունի ճիշտ ու մասնագիտացված բուժօգնություն ստանալու:

Հարց-ՊՊԾ գնդի տարածքում գտնվող զինված խմբի անդամներն այս պահին ի՞նչ են պահանջում:
Պատասխան-Նույն բանն են պահանջում, որ վիրաբուժական օգնություն ցուցաբերվի այնտեղ: Այսօր ես լսում էի ռադիոյով, չեմ հիշում, ով էր պնդում, որ այս ամենն արվել է այն պատճառով, որ իրենք չորս օր բուժօգնություն չեն ստացել: Բացարձակ իրականությանը չի համապատասխանում: Մեր ծառայությունը տասն օր իրականացրել է հերթապահություն՝ բացի գնդի տարածքից, ամբողջ կողքի շրջանում, ընդհանրապես նման հարց չի ծագել, որ իրենք, կամ որևիցե մեկը՝ կլինի բնակիչ, ցուցարար, անցորդ, ոստիկան, թե զինյալ տղաներից,  որ դիմել է շտապօգնության աշխատակիցներին, չի կարող ասել, որ բուժօգնություն չի ստացել: Մենք աշխատել ենք շատ լարված, մեր բնակչությունը տուժում էր, եղել են ուշացումներ, որովհետև  8-10 մեքենա մշտապես հերթապահում էր այդտեղ: Ես երեկ զինյալ տղաներին ասացի, եթե դուք հիմա մեքենա եք պահանջում, ինչի եք մեր մեքենան տարածքից հանել ու վնասել: «Խալաստոյ» մեքենան ուղարկել են, եկել է խփել բեռնատարին: Վերջապես այդ բուժօգնությունը ցուցաբերվում է ոչ միայն իրենց, ամբողջ քաղաքը դրա կարիքն ունի:

Հարց-Երեկ Ալեք Ենիգոմշյանն ասել էր՝ ՊՊԾ գնդում գտնվողները հայտարարել են, որ գնդի տարածքում գտնվող բուժաշխատողներին բաց կթողնեն այն դեպքում, երբ ուրիշ հերթափոխ գնա: Հնարավո՞ր է մեկ այլ հերթափոխ գնա այնտեղ:
Պատասխան-Որպես ի՞նչ պիտի գնա, ես չեմ հասկանում:  Մենք ի՞նչ երաշխքի ունենք, որ հաջորդ  հերթափոխի անդամներին էլ չեն պահի այնտեղ, կամ նրանց բաց կթողնեն: Մենք երբ կանչ ստացանք, ասացին, որ ծանր վիրավորներին պետք է տեղափոխենք հիվանդանոց: Այդ պայմանը չկատարվեց, վիրավորներին պահեցին իրենց մոտ: Հիմա մենք ի՞նչ երաշխիք ունենք, որ բուժաշխատողներին կթողնեն: Ոչ մի երաշխիք չունենք: Մենք ասում ենք, թողեք մեր բժիշկները պատշաճ օգնություն ցուցաբերեն չեզոք տարածքում, էդ ի՞նչ մի սարսափելի բան ենք առաջարկել, որ իրենք չեն ընդունել: