Ձեր վստահելի աղբյուրը

Այսօր ՀՀԿ գործադիր մարմնի նիստից հետո լրագրողների հետ զրույցում ՀՀ ԱԺ փոխնախագահ Հերմինե Նաղդալյանը հայտարարեց, որ Ոստիկանության պարեկապահակային ծառայության գնդի գրավման հետ կապված ստեղծված իրավիճակից պետք է գտնել խաղաղ հանգուցալուծում, ինչի համար էլ ընթանում են բանակցային գործընթացներ:

Նրա խոսքերով՝ իշխանության մոտեցումը հայտնել է հանրապետության նախագահը և կուսակցության խոսնակը:

«Մեր մոտեցումը եղել է այն, որ հայը հայի վրա չպետք է կրակի, արյունահեղություն և նոր զոհեր մենք չպետք է ունենանք: Իշխանությունը մինչ այսօր շարունակում է նույն մոտեցումը՝ անել ամեն ինչ, որպեսզի չունենանք նոր զոհեր, արյունահեղություն: Դրա համար արվում է ամեն ինչ և հուսով ենք, որ իսկապես գտնվելու է այդ խաղաղ հանգուցալուծումը»,- ասաց նա:

Հարցին, թե հանուն խաղաղ հանգուցալուծման ինչ զիջումների են պատրաստ, Հերմինե Նաղդալյանը նշեց, որ խնդիրը զիջումների մեջ չէ:

«Խնդիրները, որոնց մասին խոսվում է` մեր երկրում տարիների ընթացքում կուտակված խնդիրներ են, որոնց առնչությամբ բարեփոխումներ են ընթանում և այդ ուղղությամբ աշխատանքները տարվում են: Սակայն այսօր դրանք ստվերվում են գլխավոր հարցով` իրավիճակը պետք է հանգուցալուծվի առանց արյունահեղության»,- ասաց ԱԺ փոխխոսնակը:

Ըստ նրա՝ պետության համար շատ կարևոր է, որպեսզի կարողանան իսկապես ճիշտ դասեր քաղել այս ամենից:

Անդրադառնալով պատգամավոր Նիկոլ Փաշինյանի` ԱԺ արտահերթ նիստ հրավիրելու նախաձեռնությանը` Հերմինե Նաղդալյանը նշեց, որ այս հարցում ՀՀԿ-ի դիրքորոշումը հնչեցվել է ԱԺ նախագահի կողմից:

«Այսօր արդեն որոշ ստորագրություններ հավաքվել են, սակայն դրանք չեն բավարարել: Կարծում ենք, որ խնդիրը ոչ թե արտահերթ նիստ գումարելն է, այլ իրավիճակը խաղաղ հանգուցալուծելը: Այսօր կան քրեական գործեր, ընթանում է քննություն, պատգամավորների կողմից այս հարցերի քննարկումը հղի է նաև նոր սրացումներով: Հիմնական մեր մոտեցումը եղել է չվնասել այսօր ընթացող բանակցային գործընթացին: Չվնասելը եղել և մնում է մեր գլխավոր բանաձևը»,- ընդգծեց նա:

Ըստ նրա՝  մեր երկրում ոչ ոք իրավունք չունի զենք վերցնել և կրակել դիմացինի վրա. «Հայաստանում որևէ մեկն  իրավունք չունի զենքով որևէ հարցի լուծման գնալ»:

ԱԺ փոխնախագահը նաև իր մտահոգությունը հայտնեց բժիշկների պատանդառության հարցով` շեշտելով, որ այդ մոտեցումն անընդունելի է:

«Աշխարհի ամենամարդասիրական մասնագիտության ներկայացուցիչները անազատության մեջ են պահվում, երբ նրանք այնտեղ էին գնացել նրանց օգնություն ցույց տալու համար, բացի այդ, այդ օրերին էլ փորձել են օգնություն ցույց տալ: Հատկապես մտահոգված եմ, որ նրանց մեջ կին կա և բոլորվին վայել չէ հայ մարդկանց պատանդ պահել՝ հատկապես կնոջ: Անհանգստացած  ու մտահոգ եմ: Հուսով եմ, որ նրանք ազատության մեջ կլինեն և կկարողանան վիրավորներին բուժօգնություն ցույց տալ»:

Նա նաև նշեց, որ այս իրադարձությունները մտահոգիչ են ինչպես պետության հետագա զարգացման, այնպես էլ Լեռնային Ղարաբաղի խնդրի լուծման իմաստով. «Կարծում եմ՝ մինչև հողերի հանձնելու մասին խոսելը, պետք է նախ հասկանանք՝ ինչ ունենք իրականության մեջ, ինչ առաջարկներ ունենք, ինչ բանակցություններ կարող են սկսվել և ընթանալ Մինսկի խմբի համանախագահների, ՀՀ և Ադրբեջանի նախագահների միջև և ինչ նոր զարգացումներ դրանք կարող են ունենալ»: