Ձեր վստահելի աղբյուրը

Հայեցակարգի նախագծի հանրային քննարկումների շրջանակներում ԼՂՀ նախագահին կից սահմանադրական բարեփոխումների մասնագիտական հանձնաժողովը այսօր եզրափակիչ հանդիպումն է անցկացրել Արցախում գործող հասարակակական կազմակերպությունների, երիտասարդական կառույցների ներկայացուցիչների ու լրագրողների մասնակցությամբ:

Արցախի ԱԺ մամուլի ծառայության հաղորդմամբ՝ մասնագիտական հանձնաժողովի նախագահ Աշոտ Ղուլյանը ներկայացրել է հայեցակարգի բաժինները՝ մասնավորապես ուշադրություն հրավիրելով մարդու և քաղաքացու հիմնական իրավունքների ու ազատությունների, ինչպես նաև կառավարման համակարգ գլուխներում առկա թերությունների և առաջարկվող փոփոխությունների վրա:

ԼՂՀ ոչ կառավարական կազմակերպությունների ղեկավարները տեսակետներ են ներկայացրել առաջարկված թեմաներով՝ արտահայտելով որոշ մտահոգություններ պետական ու տեղական ինքնակառավարման համակարգերի թերացումների մասին: Քննարկման ընթացքում մասնակիցների ելույթներն ու առաջարկությունները մեծամասամբ վերաբերել են կառավարման այնպիսի մոդելի ընտրությանը, որը պետք է երաշխավորի Արցախի անվտանգությունն ու ներքաղաքական կայունությունը:

Մասնագիտական հանձնաժողովն առաջիկա օրերին կամփոփի հանրային քննարկումների արդյունքները և հայեցակարգը կներակայցնի հանրապետության նախագահին: