Ձեր վստահելի աղբյուրը

Քրեական օրենսգրքով՝ եթե մարդուն առևանգում են, այսինքն մարդուն զրկում են անձնական ազատությունից, ազատ արձակելու դիմաց պահանջ չեն դնում, որպեսզի պետական մարմինը կատարի որոշակի գործողությոն, նշանակում է մարդու առևանգում: Եթե զրկում են անձնական ազատությունից, ազատելու դիմաց պահանջ են դնում, որ պետական մարմինը պետք է կատարի մի գործողություն, հակառակ դեպքում բաց չենք թողնի, արդեն նշանակում է պատանդ վերցնել,- «Մեդիա կենտրոն»-ում «Երևանյան իրադարձություններ. Ոստիկանության գործողությունները խաղաղ հավաքների ժամանակ» թեմայով քննարկմանն ասաց իրավաբան, «Իրավունքի գերակայություն» իրավապաշտպան  Արա Ղազարյանը՝ պատասխանելով հարցին, թե ինչպե՞ս կգնահատեք ՊՊԾ գնդում տիրող իրավիճակը, արդյո՞ք բժիշկները պատանդ են:

«Այնքանով, որքանով փաստերն ինձ հայտնի են՝ ստացած լրատվամիջոցներից, տեղեկատվությունը ճիշտ է, բժիշկները պատանդի  վիճակում են, որովհետև պայման է  առաջադրվել՝ մինչև այլ խումբ չուղարկվի, այստեղ բժշկական միջամտություն չարվի  և այլն, և այլն: Սա  ինքնին  գնում է Քրեական օրենսգրքի 218-րդ հոդվածի (Պատանդ վերցնելը) դաշտ, որ թե 131–րդ հոդվածի  (Մարդուն  առևանգելը) դաշտ»,- ասաց իրավաբանը:

Ա.Ղազարյանի միաժամանակ նշեց, որ նույնիսկ ռազմական գործողությունների ժամանակ այդ անձանց ազատությունից զրկելը, հրթիռակոծությունը, չի թույլատրվում՝ հումանիտար իրավունքով: 

«Օրինակ՝ ապրիլյան պատերազմի ժամանակ ադրբեջանական կողմը կրակեց սանիտարական մեքենայի վրա: Փաստը ֆիքսված է»,- հիշեցրեց միջազգային իրավունքի մասնագետը:

Քննարկման ներկա ազգագրագետ Հրանուշ Խառատյանը չի տեսնում, որ  ապստամբները պատանդ վերցնելու ճանապարհով խնդիրները լուծելու ընթացքի մեջ  են:

ՔԱ Վանաձորի գրասենյակի նախագահ Արթուր Սաքունցնի խոսքով, «Սասնա ծռեր» խմբի  վերաբերյալ այս պահին լիարժեք չեն կարող որևէ դատողություն անել, քանի որ նրանց կողմից որևէ տեղեկատվություն չկա:

«Ունենք միայն ԱԱԾ, ոստիկանության, քննչական կոմիտեի տեղեկատվությունները, որոնք ես ավելի շատ համարում եմ ապատեղակատվություն»,- նշեց նա:

Հուլիսի 27-ին ոստիկանությունը հայտարարել էր. «Այս գիշեր հաղորդվել էր, որ, ըստ զինված խմբի, ՊՊԾ գնդի տարածքում կա ևս երկու վիրավոր: Իրավապահները նրանց բուժօգնություն տրամադրելու կոչ էին արել և մերժում ստացել: Վիրավորներին բուժհաստատություն տեղափոխելու կոչ էին արել նաև հարազատները։ Իրավապահներն ապահովել էին բոլոր անհրաժեշտ պայմանները։ Իսկ երբ բժիշկները ժամանել են, նրանց պատանդ են վերցրել:
Իրավապահները միջոցներ են ձեռնարկում պատանդված բժիշկներին բանակցությունների միջոցով ազատելու համար»: Այս պահին գնդի տարածքում են գտնվում բժիշկներ  Նորայր Թևանյանը, Սալվադոր Խեչոյանը, բուժքույր Մալինա Մարգարյանը: Բուժակ Դավիթ Տոնոյանն ազատ է արձակվել: