Ձեր վստահելի աղբյուրը

«Սասնա ծռեր» զինված խմբի անդամներ Գագիկ  Եղիազարյանին և Արամ Հակոբյանին նախօրեին առաջադրվել է մեղադրանք  ՀՀ Քրեական օրենսգրքի 219-րդ հոդված 3-րդ մասի 1-ին կետով (Կազմակերպված խմբի կողմից՝ շենքեր, շինություններ, տրանսպորտի, հաղորդակցության կամ կապի միջոցներ զավթելը) և 235-րդ հոդվածի 3-րդ մասով (Կազմակերպված խմբի կողմից՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։ Panorama.am-ին տեղեկացրեց փաստաբան Լուսինե Հակոբյանը:

«Իրենք առաջադրված մեղադրանքը չեն ընդունում»,- ընդգծեց նա:

Լ. Հակոբյանը նաև հայտնեց, որ դատարանը երեկ ուշ երեկոյան բավարերել է քննիչների միջնորդությունը՝ նրանց նկատմամբ կալանքը կիրառել որպես խափանման միջոց: Գագիկ  Եղիազարյանն ու Արամ Հակոբյանը տեղափոխվել են ԱԱԾ մեկուսարան:

Փաստաբան Լ. Հակոբյանը վերաքննիչ բողոք է ներկայացնելու, քանի որ երկուսի դեպքում էլ կալանքի որոշումներն անհիմն են:

«Քննիչները որևէ ապացույց չեն ներկայացրել  իրենց միջնորդությունները հիմնավորելու համար: Օրինակ՝ Գագիկ Եղիազարյանի քննիչը նշել էր, որ եթե չկալանավորեն, կթաքնվի նախաքննությունից, բայց որևէ ապացույց չի ներկայացրել: Իսկ այդ ապացույներն անհրաժեշտ են»,- ասաց փաստաբանը:

Հիշեցնենք, որ հուլիսի 27-ին ոստիկանությունը հայտարարել էր, որ ՊՊԾ գնդի տարածքում իրավապահներին են հանձնվել զինված խմբի անդամներ Գագիկ Եղիազարյանն ու Արամ Հակոբյանը:

Պատասխանելով հարցին, թե արդյոք այն, որ ըստ ոստիկանների իրենք հանձնվել են, մեղմացուցիչ հանգամանք չի դիտվում, փաստաբանն ասաց. «Վարույթում գտնվող քրեական գործի շրջանակներում չկա որևէ նյութ, որը կվկայի, որ նրանք հանձնվել են:Իրենց առաջադրված մեղադրանքում էլ որևէ նման նշում չկա. քարոզչական նպատակ է հետապնդում»: