Ձեր վստահելի աղբյուրը

Աչքից զրկված 17-ամյա Սայաթ Հարությունյանի քույրը՝ Սվետլաննա Հարությունյանը, Սուրբ Գրիգոր Լուսավորիչ ԲԿ-ում այս պահին աշխատող  Panorama.am-ի թղթակցի հետ զրույցում պատմեց, որ անչափահաս եղբայրն իրադարձությունների մեջտեղում է հայտնվել պատահաբար:

Քույրն ուսանող է, Երևանում վարձով է ապրում, միաժամանակ աշխատում է: Եղբայրը Գեղարքունիքից եկել էր Երևան՝ որպեսզի օգոստոսի 8-ի ծննդյան տարեդարձին ընդառաջ հագուստ գնի:

«Քանի որ ես տանը չեմ եղել, աշխատանքի էի,  ինքը գնացել է քաղաք ման գալու: Որոշել է Կենտրոնից ոտքով հասնել Սարի թաղ՝ հորեղբորը տեսնելու: Այդ հատվածը ստիպված ոտքով է բարձրացել, քանի որ երթուղային տաքսիներ չեն եղել»,-ասաց քույրը:

Նա նշեց, որ հորեղբայրն էլ Սարի Թաղի բնակիչ չէ, Ռուսաստանից նոր է վերադարձել, մի քանի օր է՝  բարեկամների տանն է ապրում: Քրոջ խոսքով, Կենտրոնից Սարի Թաղ հասնելու միջոցը համընկել է պայթուցիկների գործի դրմանը:

«Ինքը նույն պահին էլ հասկացել է, որ աչքից զրկվել է: Էդքանից հետո մեզ հույս է տալիս՝ ասելով ոչինչ, լավ կլինի, մի մտածեք»,-պատմեց քույրը:

Սայաթի հոգեբանական վիճակը նորմալ է, ծնողներն այս պահին տղայի մոտ են: Բժիշկների խոսքով, դեռ երկու օր նա կմնա հիվանդանոցում: