Ձեր վստահելի աղբյուրը

«Խստորեն դատապարտում եմ ոստիկանների և այն ոչ համազգեստավոր մարդկանց գործողությունները, որոնք ինչ-որ ավազակախմբի անդամների տպավորություն էին թողնում, որոնք ոչ համարժեք և չափազանց սխալ գործողություններ են իրականացրել ցուցարարների և հատկապես լրագրողների նկատմամբ»,- այսօր լրագրողների հետ հանդիպմանն ասաց «Առավոտ» օրաթերթի գլխավոր խմբագիր Արամ Աբրահամյանն՝ անդրադառնալով գիշերը Սարի թաղում տեղի ունեցած դեպքերին:

«Նրանք թիրախավորված հարձակվել էին լրագրողների վրա՝ նպատակը ուղիղ հեռարձակումներն ընդհատելն էր...որ չլինեին լուսանկարներ, տեսանակարահնումներ, ձայանգրություններ, որպեսզի նրանց գործողությունները չֆիքսվեն: Սակայն դա հնարավոր չէ անել, դա ապացուցվեց նաև «էլեկտրիկ Երևանի» ժամանակ»,-ասաց Առավոտ օրաթերթի գլխավոր խմբագիրը:

Նա նշեց, որ այստեղ տեսնում է հասարակության և լրագրողների նկատմամբ որոշակի վրեժխնդրություն, որը խիստ դատապարտելի է. «Չեմ ասում, որ ոստիկանները չպիտի հսկեն ՊՊԾ գնդի տարածքը և պիտի թույլ տան, որ մարդիկ այնտեղ անցնեն, բայց ամեն ինչ պետք է արվի օրենքով: Եթե դուք ասում եք, որ այսինչը խախտել է օրենքը, ապա դուք դա պրոֆեսիոնալ պետք է անեք, բոլորը պետք է ունենան իրենց համազգեստը և չանեն այնպես, ինչպես որ անում է «թաղի խուժանը»: Փաստեր չունեմ, բայց հակված եմ հավատալու, որ այստեղ մասնակցում էին ոչ ոստիկանության ծառայողները, այլ պարզապես օլիգարխներից մեկի բանդան էր»:

Ասուլիսին ներկա Ա1+ լրատվական կայքի տնօրեն Մեսրոպ Մովսեսյանն էլ, անդրադառնալով հարցին, թե ինչպես են խմբագրվում իրադարձություններ և ով պետք է դրանով զբաղվի, նշեց. «Նախ սկսենք նրանից՝ ով ինչպես է հասկանում խմբագրել հասկացությունը: Որոշում է խմբագիրը և տվյալ վայրում աշխատող լրագրողը, ինչը հեռարձակի, ինչը՝ ոչ: Բայց, երբ որ փորձում են  փակել բերանը, կտրել լեզուն, պոկել ձեռքերը, ջարդել խցիկը, այդ պայմաններում դժվար է մտածել թե ոնց պետք է խմբագրել»:

Ինչ վերաբերում է նրան, թե արդյոք պաշտպանվա՞ծ է իր մասնագիտական աշխատանքը կատարող լրագրողի անվտանգությունը և արդյոք  կարո՞ղ է անվտանգությունից ելնելով լրագրողը հեռանալ դեպքի վայրից, նա պատասխանեց. «Լրագրողը ունի նման իրավունք, սակայն պրոֆեսիոնալ լրագրողները դա չեն անում: Գիշերն այցելել եմ հիվանդանոց մեր լրագրող՝ Ռոբերտ Անանյանին տեսակցության.  նա ուներ բազմաթիվ վնասվածքներ, սակայն նա բացարձակ վախեցած չէր, միայն շոկի մեջ էր: Արնահոսելով՝ նա մոտ մեկ ժամ աշխատել է»:

Ասուլիսի մյուս բանախոս, տեղեկատվության անվտանգության փորձագետ Սամվել Մարտիրոսյանն էլ, միանալով  դատապարտող  խոսքերին, շեշտեց, որ բնակելի վայրում հատուկ միջոցների կիրառումը մեղմ ասած անհասկանալի է:

«Լրագրողների վրա հարձակումները շատ լուրջ դեպքեր են: Կարծում եմ այն, որ Բաղրամյանի դեպքերից հետո լրագրողական համայնքը հետամուտ չեղավ, որպեսզի իսկապես պատժվեն մեղավորները, մենք հիմա դրա հետևանքներն ունենք: Լրագրողական համայնքը պետք է ոչ միայն միասնական կարծիք հայտնի, այլ ինչ-որ գործողությունների անցնի»:

Անդրադառնալով  լրահոս կանխելուն, կասեցնելուն՝ նա նշեց, որ լրագրողների հետապնդելով հարցը չի լուծվի, քանի որ այսօր յուրաքանչյուր քաղաքացի իր հեռախոսով հանդիսանում է լրագրող. «Իրականում մենք այսօր ունենք հազարավոր լրագրողներ, որոնք դեպքի վայրից տեղեկատվություն են տալիս, ուղղակի մի մասն այդքան պրոֆեսիոնալ չէ»: 

Բանախոսները նշեցին, որ ի պատասխան սրան, լրագրողները կարող են հրաժարվել որոշ ոլորտներ լուսաբանելուց: