Ձեր վստահելի աղբյուրը

Խորենացի փողոցում և Սարի թաղում նախօրեին տեղի ունեցած միջադեպի հետևանքով Երևանի «Սուրբ Գրիգոր Լուսավորիչ» բժշկական կենտրոն է տեղափոխվել ընդհանուր թվով 50 տուժած, որոնցից 36-ն արդեն դուրս է գրվել: Այս մասին այսօր լրագրողների հետ զրույցում ասաց  «Սուրբ Գրիգոր Լուսավորիչ» ԲԿ-ի փոխտնօրեն Գագիկ Մանուկյանը:

Նրա խոսքերով՝ այս պահին հիվանդանոցում շարունակում է բուժում ստանալ 13 տուժած, որից 3-ը՝ ոստիկան:

Գագիկ Մանուկյանն ասաց, որ բոլոր տուժածները հիմանակում ստացել են ոտքերի, ձեռքերի վնասվածք:

Միայն վիրավորներից մեկը՝ 17-ամյա Սայաթ Հարությանյանը, հիվանդանոց է տեղափոխվել աչքի վնասվածքով: ԲԿ-ի փոխտնօրենն ասաց, որ վերջինս վիրահատվել է, աչքը հեռացվել է, վիճակը բավարար է:  Նա դեռևս կմնա վերակենդանացման բաժանմունքում:

«Սուրբ Գրիգոր Լուսավորիչ» ԲԿ-ի փոխտնօրենը նշեց նաև, որ տուժածներից 4-ը գտնվում են վնասվածքաբանական, 7-ը՝ վերակենդանացման բաժանմունքներում: Բոլորի վիճակը կայուն է:

Բոլոր տուժածները, ըստ նրա, մինչև երկուշաբթի կամ երեքշաբթի օրը կմնան հիվանդանոցում:
Նշենք, որ տուժած մեկ օպերատոր և մեկ լրագրող ևս տեղափոխվել են «Սուրբ Գրիգոր Լուսավորիչ» ԲԿ: Նրանք ստացել են հիմնականում վերջույթների վնասվածք, հյուսվածքների սալջարդ:

Գագիկ Մանուկյանը նաև հայտնեց, որ գիշերը այրվածքով մեկ հիվանդ տեղափոխվել է իրենց հիվանդանոց, սակայն վիճակը կայունացնելուց հետո տեղափոխել են  Ճառագայթային բժշկության և այրվածքների կենտրոն: