Ձեր վստահելի աղբյուրը

ԱԺ պատգամավորներ  Ռուբիկ Հակոբյանն ու Լյովա Խաչատրյանը պատգամավորների շրջանում նախաձեռնել են ստորագրահավաք՝ միջնորդելու, որպեսզի «Ժառանգություն» կուսակցության փոխնախագահ Արմեն Մարտիրոսյանի նկատմամաբ որպես խափանման միջոց կալանք չկիրառվի:

«Միջնորդության ներքո ստորագրել են մոտ 15 պատգամավորներ, գրեթե բոլոր խմբակցություններից կան, բացի Հանրապետականից»,-Panorama.am-ի հետ զրույցում ասաց Ռ. Հակոբյանը:

Նրա խոսքով, այսօր կեսօրից հետո ինքն ու Լ. Խաչատրյանը հանդիպել են ձերբակալված, ՁՎՊ-ում պահվող Արմեն Մարտիրոսյանի հետ, ինչից հետո էլ հանդես են եկել նման նախաձեռնությամբ:

«Առաջարկվել է շատերին, ժամանակի սղության պատճառով ոմանք չհասցրեցին ստորագրել, կարծում եմ նաև Հանրապետական խմբակցությունից»,-ասաց Հակոբյանը:

ՀՀ ՔԿ ՀԿԳ քննության վարչության թիվ 69 10 71 16 քրեական գործով վարույթն իրականացնող մարմնին ներկայացված միջնորդագրում ասված է.  «Միջնորդում ենք, Արմեն Մարտիրոսյանի նկատմամբ ազատությունից զրկելու հետ կապված, խափանման միջոց չկիրառել և օրենքով սահմանված կարգով մեր՝ ներքոստորագրյալ պատգամավորներիս անձնական երաշխավորությամբ նրան ազատ արձակել»:

Նա հիշեց ստորագրած պատգամավորներից մի քանիսի անուններ՝ Ալեքսանդր Արզումանյանը, Տիգրան Ուրիխանյանը, Հեղինե Բիշարյանը, Մհեր Շահգելդյանը, Վարդան Օսկանյանը,  Զարուհի Փոստանջյանը, Վահե Հովհաննիսյանը, Ստեփան Մարգարյանը, Վահե Էնֆիաջյանը, Նաիրա Զոհրաբյանը լիազորագրով է ստորագրել, Լևոն Զուրաբյանը:

Հակոբյանն ասաց, տեսակցության ժամանակ Արմեն Մարտիրոսյանն ընկճված չի եղել, գանգատ չի ունեցել:

Հիշեցնենք, որ Արմեն Մարտիրոսյանի ձերբակալման 72 ժամը շուտով կլրանա: Նրա նկատմամբ խափանման միջոց պետք է ընտրվի: