Իսկ եթե ոչ թե «Սասնա ծռեր» խումբը լիներ, այլ մի լավ դիվերսիոն խումբ որևէ մի հզոր երկրից. Ռուբեն Բաբայան

Հասարակություն 14:37 02/08/2016 Հայաստան

Եղիշե Պետրոսյանը բացարձակապես վտանգավոր չէ, վաղուց եմ ճանաչում նրան՝ կարգին մարդ է, հրաշալի արվեստագետ, կարծում եմ՝ ինչքան շուտ բաց թողնեն, այնքան լավ,- լրագրողների հետ հանդիպման ասաց Հ. Թումանյանի անվան պետական տիկնիկային թատրոնի գեղարվեստական ղեկավար, ՀՀ արվեստի վաստակավոր գործիչ Ռուբեն Բաբայանը:

«Կոչ եմ անում ժամ առաջ ազատ արձակել նրան, առավել ևս, որ ունի առողջական խնդիրներ»,- կրկնեց նա:

Հիշեցնենք, որ Եղիշե Պետրոսյանը ձերբակալվել է հուլիսի 30-ին զանգվածային անկարգություններ կազմակերպելու կասկածանքով:

Ռ.Բաբայանն ասաց, որ ՊՊԾ գնդի գրավման, դրանից հետո կատարված իրադարձությունների հետևանքով բազմաթիվ մարդիկ կան ձերբակալված. «Կարծում եմ՝ մեծամասնությունը երևի անարդարացի է: Բոլորիս պարտքը պետք է լինի հետևել, որ ընդհանրապես անօրինական որևէ հետապնդում չլինի: Սա շատ կարևոր է»:

Արվեստագետի կարծիքով, հետաքննությունը ցույց կտա ոչ միայն զինված խմբի յուրաքանչյուր անդամի մեղքը, այլ նաև՝ ինչպես կատարվեց այդ իրադարձությունները, որտեղ էր գտվում ԱԱԾ-ն, ինչ ձևով էր պահպանվում այդ գունդը:

«Սրանք էլ են հանցանքներ: Այնպես չէ, որ մի կողմից է կատարվել հանցանքը: Եթե դուք վատ եք կատարում ձեր պաշտոնական պարտականությունները, դուք հանցանք եք գործել, առավել ևս՝ նման ասպարեզում, որը կապված է երկրի անվտանգության հետ: Իսկ եթե ոչ թե «Սասնա ծռեր» խումբը լիներ, այլ մի լավ դիվերսիոն խումբ որևէ մի հզոր երկրից, որ այդքան հեշտությամբ է կարողացել ճեղքել ուժային կառույցը: Լուրջ և քննարկման, և հետազոտման հարց է»,- ասաց Ռ.Բաբայանը:

Նա նաև հավելեց. «Եթե լինի օբյեկտիվ հետաքննություն, կպարզվի, ում ձեռքն է խառը եղել այս տեսակ հանգիստ անցնելու ու գունդը գրավելու մեջ: Չեմ կարծում, որ դա ընդդիմությունն է կազմակերպել»:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: