Ձեր վստահելի աղբյուրը

ՊՊԾ գնդի գրավումն ու դրան հաջորդած իրադարձությունների վերլուծության ժամանակը դեռ կգա, քանի որ այսօր կրքերը դեռ բորբոքված են, ելույթները հուզումնախառն են, պետք է սթափ մտածողությամբ լինի ամենի ինչ,- լրագրողների հետ հանդիպման ասաց Հ. Թումանյանի անվան պետական տիկնիկային թատրոնի գեղարվեստական ղեկավար, ՀՀ արվեստի վաստակավոր գործիչ Ռուբեն Բաբայանը:

«Իրականում ինչն էր, որ չհաջողվեց, ինչու չհաջողվեց: Հաճախակի խոսվում էր, որ ցանկությունները բարի էին: Իսկապես, ցանկությունները բարի էին, բայց չհաջողվեց: Կարծում եմ՝ և մեր առօրյա կյանքը, և այն, ինչ տեղի ունեցավ երկու շաբաթվա ընթացքում, ապացուցեց մի պարզ բան՝ պետք է ամեն ինչին սովորել, պատրաստվել, ուսումնասիրել, պետք է հեղափոխական լինես, պատրաստվես, թե ինչպես են անում հեղափոխություն: Մենք հաճախակի հայրենասիրությունը դարձնում ենք մի դրոշ, որն արդարացնում է բոլոր տեսակի տաղանդների բացակայությունը: Մեզ մոտ բոլորը խոսում են հայրենասիրությունից:

Բոլոր պարագաներում մենք կրթական, գիտական համակարգերը գցել ենք մի կողմ և ասում ենք՝ առաջնորդվում ենք սրանով: Ոչ մեկին երբեք չի խանգարի սովորել, աշխատել, զարգանալ: Նայեք մեր քաղաքական դաշտը՝ իշխանություն, ընդդիմություն, մարդկանց, որոնց արդեն 10-15 տարի է ճանաչում ենք, բացառությամբ 1-2 հոգու, նույն մակարդակի վրա են: Հնարավոր չէ կյանքում այդպես ապրել՝ անցյալ դարի մտածողությամբ ու համարես, որ դա սկզբունքայնություն է: Դա սկզբունքայնություն չէ, դա կյանքն ու ժամանակն ընկալելու բացակայությունն է»,- ասաց արվեստագետը:

Ըստ Ռ. Բաբայանի, այսօրվա ամենակարևորը խնդիրն է. «Ատելությունը շատ-շատ է: Ատելության արդյունքում որևէ բան չի ծնվում: Ծնվում է միայն սիրո արդյունքում: Սա վերաբերում է ոչ միայն բնության օրենքներին, նաև  հասարակության օրենքներին: Ոչ ոք ոչ մեկին չէր հավատում, բոլորին մեղադրում էին գործակալ, ծախված լինելու մեջ:  Մարդը պետք է հավատա միայն ինքն իրեն ու Աստծուն: Ստրուկն է միայն տիրոջը հավատում: Ուղեղը տրված է նրա համար, որ կարողանաս  ըստ փաստերի տրամաբանես, մտածես, ինքնուրույն եզրահանգումների գաս, ոչ թե կուրորեն հավատաս որևէ մեկին ու նրա խոսքն ընդունես հալած յուղի տեղ: Բա դու որտե՞ղ ես, քո ես-ը որտե՞ղ է:  Պետք է հասկանալ, որ զարգացած հասարակությունն այն չէ, որտեղ մեկի կարծիքը ճնշում է մնացածների: Ժամանակն է, որ մենք մեզ դրսևորենք որպես երկրի քաղաքացի, ունակ լինենք մտածել, ոչ թե վազվզել կուռքերի ետևից:

Մենք պետք է կաթիլ առ կաթիլ ատելությունը վերացնենք: Այս երկու շաբաթվա ընթացքում երևի թե այն առաջատարներից էի, որ բազմաթիվ հայհոյանքներ, մեղադրանքներ լսեցի իմ հասցեին: Ոչ մեկին չեմ պատասխանել, քանի որ պատասխանելը, վիրավորելը նշանակում է կամուրջներն այրել: Փորձենք իրար հասկանալ:

Մեղավորներ պետք չէ ման գալ: Մեր բոլորի պարտությունն է, այս արյունը բոլորիս վրա է, թող ոչ ոք չկարծի, որ ինքն այդ արյան հետ կապ չունի: Այս վիճակից կարող ենք դուրս գալ կամ պարտված,  կամ գնանք դեպի հաղթանակ: Հաղթանակ կարող է գալ միայն իրար սիրելով, իրար ձեռք տալով, ունենալով կոնկրետ գաղափար և նպատակ»:

Ռ. Բաբայանի խոսքով,  իշխանափոխություն կատարվում է ոչ թե այն պատճառով, որ այդ իշխանությունները վատն են, այլ նույնիսկ լավ իշխանությունը պետք է փոխվի, քանի որ ճահճանում է. «Սա աքսիոմ է, որ մեր իշխանությունը չի հասկանում»:

Խոսելով նախօրեին ՀՀ նախագահ Սերժ Սարգսյանի ելույթի մասին, մասնավորապես այն հատվածի, որտեղ ասվում է՝ «Երևանը Բեյրութ կամ Հալեպ չէ», Ռուբեն Բաբայանն ասաց. «Շատ կուզենայի, որ մենք թույլ չտայինք, որ Սյունիքի մարզը դառնար Հյուսիսային Կորեա, Հայաստանի Հանրապետությունը՝ Կրասնոդարի երկրամաս»: