Ձեր վստահելի աղբյուրը

Երևանի ավագանու «Բարև Երևան» դաշինքի անդամ Դավիթ Սանասարյանը երկու ամսով կալանավորվել է. նախօրեին դատարանը բավարարել է կալանքը որպես խափանման միջոց ընտրելու քննիչի միջնորդությունը: Սանասարյանը տեղափոխվել է «Նուբարաշեն» ՔԿՀ,- Panorama.am-ին տեղեկացրեց Դ.  Սանասարյանի պաշտպան, Փաստաբանների պալատի անդամ Ռոբերտ Ռևազյանը:

Հիշեցնենք, որ Դ. Սանասարյանին մեղադրանք մեղադրանք էր առաջադրվել 225-րդ հոդվածի 1-ին մասով (Զանգվածային անկարգություններ կազմակերպելը):

Փաստաբանն ասաց, որ կալանավորման որոշումն անպայման բողոքարկելու է: 

Ռ. Ռևազյանը նաև տեղեկացրեց, որ դատարանում՝ կալանքի միջնորդության քննության ժամանակ, Դ. Սանասարյանի վիճակը վատացել է, մեջքի շրջանում սուր ցավեր է ունեցել,  կանչել են շտապօգնություն:

«Բժշկուհին եզրակացրել է՝ բորբոքում ունի, պետք  հետազոտվի և բուժում անցնի, այլապես խնդիրներ կառաջանան»,- ասաց փաստաբանը:

Ռ. Ռևազյանի խոսքով, այս հարցով դիմելու է ՔԿՀ-ին:

Հիշեցնենք, որ ՔԿ հատկապես կարևոր գործերի քննության գլխավոր վարչությունում հուլիսի 30-ին հարուցվել է  քրեական գործ՝ հուլիսի 29-ի ուշ երեկոյան Էրեբունի  և Նուբարաշեն վարչական շրջանում տեղի ունեցած անկարգությունների դեպքերի առթիվ։
Զանգվածային անկարգությունները կազմակերպելու և դրանց մասնակցելու կասկածանքով ձերբակալվել է 23 անձ: