Ձեր վստահելի աղբյուրը

Թուրք իրավապահները Ստամբուլի Աթաթուրքի անվան միջազգային օդանավակայանից արտաքսել են ֆրանսահայ Ռիչարդ Դեմիրջիին: Այս մասին գրում է «Էրմենիհաբեր»-ը՝  վկայակոչելով «Ակօս» շաբաթաթերթին: Ըստ աղբյուրի,  ֆրանսահայը արտաքսվել է  թուրքերեն իմանալու պատճառով:

Դեպքի մանրամասները թերթին ներկայացրել է Ռիչարդ Դեմիրջիի որդին՝ Դանիել Դեմիրջին:

Դեպքը տեղի է ունեցել կիրակի օդանավակայանի մուտքի մոտ, որտեղ ոստիկանները կանգնեցրել են մեքենան և ուղևորներից, այդ թվում և Դեմիրջիից պահանջել անձնագիր: Երբ Դեմիրջին իր ֆրանսիական անձնագիրը ներկայացնելուց հետո ոստիկանների հարցերին պատասխանել է թուրքերենով, նրան հարցրել են, թե արդյոք նա թուրք է:

Ոստիկանների՝ «թուրքերեն ես խոսում, ծննդավայրդ Սղերթ է նշված, ինչպե՞ս թե թուրք չես» հարցմանն ի պատասխան Դեմիրջին ասել է, որ ազգությամբ հայ է, Ֆրանսիայի քաղաքացի: Դրանից հետո ոստիկանները որոշել են թե նա ահաբեկիչ է և իջեցնելով մեքենայից շտապ մեկուսացրել են, իսկ հաջորդ օրը դատարանի որոշմամբ նրան արտաքսել են:

Որդու տեղեկացմամբ՝ Ռիչարդ Դեմիրջին ամիսը մեկ անգամ աշխատանքային այցով մեկնում էր Թուրքիա, իսկ այժմ նրա մուտքն արգելվել է: