Ձեր վստահելի աղբյուրը

Ապրիլյան պատերազմում վիրավորված Ավետիս Զարգարյանը դեռևս վերակենդանացման բաժանմունքում է: Ինչպես Panorama.am-ի թղթակցի հետ զրույցում նշեց Ավետիսի հայրը՝ Հայկազ Զարգարյանը, տղայի առողջական վիճակում առկա է աննշան դրական տեղաշարժ:

«Ոտքերը դեռ թույլ են, Ավետիսի հետ աշխատում են մերսող մասնագետներ: Օրական մի քանի ժամ մերսում են նրա ոտքերի, ձեռքերի մկանները: Մերսումներից հետո ոտքերը զգում է, բայց չի շարժում, ձեռքերն էլ բարձրացնում է, բայց մատները դեռ չի շարժում: Բժիշկներն ասում են, որ ժամանակ է պետք, մենք էլ սպասում ենք….», - ասաց նա:

Երկու օր առաջ Ավետիսը, ով չորս ամիս վերակենդանացման բաժանմունքից դուրս չէր եկել, սայլակով զբոսնել է հոսպիտալի բակում, ինչը բարձրացրել է նրա  տրամադրությունը: 

19-ամյա Ավետիսն արդեն չորս ամիս է` պառկած է Երևանի կենտրոնական կլինիկական հոսպիտալի վերակենդանացման բաժանմունքում: Վիրավորվել է ապրիլի 4-ին Թալիշի մարտական գործողությունների ժամանակ, գնդակը մտել է նրա ծնոտը, թիկունքով ներքև իջել և վնասել մի քանի ողը, ողնուղեղը: Բժիշկները թեև հույս չունեին, որ Ավետիսը կապրի, բայց ամեն ինչ անում էին նրան փրկելու համար: Ավելի քան մեկ ամիս միացված էր արհեստական շնչառության ապարատին, այդ ընթացքում Ավետիսին երկու անգամ վիրահատել են, հեռացրել են ողնաշարի գնդակը, վերականգնել բեկորից վնասված ձեռքի ոսկորը: Ավետիսին սպասվում է նոր վիրահատություն: Նրա ծնոտը բազմաբեկորային վիրավորում է ստացել, պետք է վիրահատեն, բայց առողջական վիճակը թույլ չի տալիս:

«Շատ նիհարել է, հյուծված է, նորմալ չի սնվում: Եթե առողջական վիճակում դրական տեղաշարժ լինի, կվիրահատեն»,- ասաց Հայկազ Զարգարյանը:

Նրա խոսքերով՝ վատթարագույն իրավիճակից եկել են որոշակի կայունացման, ժամանակ է պետք, որ որդին վերականգնվի:

«Բժիշկները Ավետիսիս այդ դժվար վիճակից հանել են, ամեն ինչ արել են, որ ապրի, հիմա ի՞նչ կարող են անել, ժամանակ է պետք, որ վերականգնվի...: Եթե ես իմանամ, որտեղ իմ երեխուն կբուժեն, ամեն ինչ կանեմ, որ նրան բուժեն, բայց խնդիրը մեկը չէ...: Հույսներս Աստծո վրա դրած` սպասում ենք»:

Նշենք, որ Զարգարյանները Արցախի Գետաշեն գյուղից են: Արցախյան պատերազմի ժամանակ հեռացել են այնտեղից և բնակություն հաստատել Գեղարքունիքի մարզի Վարդենիս քաղաքում:

Աշխատելու նպատակով երեք տարի առաջ ընտանիքը մեկնել է Ռուսաստան, սակայն Ավետիսը վերադարձել է Հայաստան զինվորական պարտքը կատարելու: Զարգարյանները Ռուսաստան մեկնելու համար վաճառել են Վարդենիսի իրենց տունը, հիմա այստեղ ոչինչ չունեն: Ավետիսի վիրավորվելուց հետո էլ Ռուսաստանում թողել են աշխատանքը և ընտանիքով վերադարձել Հայաստան: