Ձեր վստահելի աղբյուրը

«Սասնա ծռեր» խմբի անդամ Արմեն Բիլյանն առողջական խնդիրներ ունի, սակայն դեռ չի հոսպիտալացվել,- լրագրողների հետ հանդիպմանն ասաց Հանրային պաշտպանի գրասենյակի իրավապաշտպան Արմինե Ֆանյանը:

«Դիպուկահարի կրակոցի արդյունքում վայր է ընկել պատնեշից, կարծես ողնաշարն է վնասել: Դժվարությամբ է տեղաշարժվում: Միջոցներ ենք  ձեռնարկում հնարավորինս արագ հետազոտում կազմակերպելու համար: Ընդամենը ցավազրկողների միջոցով ապահովվել են նրա մասնակցությունը դատական նիստին»,- ասաց նա:

Արմեն Բիլյանը, ինչպես և խմբի մյուս անդամները, կալանավորված է: Նրան առաջադրված է մեղադրանք ՀՀ քրեական օրենսգրքի 218-րդ հոդվածի 3-րդ մասի 1-ին կետով (պատանդ վերցնելը) և 235-րդ հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել):

Նա իրեն մեղավոր չի ճանաչում: Կալանքի որոշումը բողոքարկվելու է:

Փաստաբանի խոսքով,  առաջադրված երկու հոդվածն էլ ունեն խրախուսական նորմեր, ըստ որոնց՝ սահմանված կարգով եթե անձն ազատ է արձակում պատանդին կամ զենքերն է հանձնում, ապա  ենթակա չէ պատժի կրման, եթե այլ հանցակազմ չկա: