Ձեր վստահելի աղբյուրը

Երկու ամսով կալանավորած «Ոտքի Հայաստան» քաղաքացիական շարժման անդամ, քաղաքագետ Անդրիաս Ղուկասյանը ցավեր ունի ծնկների շրջանում:  Այնքանով, որքանով մեկուսարանի պայմաններում հնարավոր է բուժօգնություն ցույց տալ, տրվում է, վերքերը կապում են,- Panorama.am-ին տեղեկացրե Ա.Ղուկասյանի պաշտպան, Փաստաբանների պալատի անդամ Երվանդ Վարոսյանը:

«Վերքերն առաջացել են հուլիսի 29-ին Սարի թաղում ոստիկանների գործողություններից, երբ իրեն արդեն գետնին գցած ժամանակ մահակներով բազմաթիվ հարվածներ են հասցրել ծնկներին»,- հավելեց նա:

Հարցին, թե արդյո՞ք «Դատապարտյլաների հիվանդանոց» ՔԿՀ կամ որևէ քաղաքացիական հիվանդանոց տեղափոխելու դիմում ներկայացնելու եք, Ե.Վարոսյանն ասաց, որ այս պահի դրությամբ դեռ ոչ, հաշվի առնելով նաև այն հանգամանքը, որ Ա.Ղուկասյանը գտնվում է հացադուլի մեջ, պահվում է «Նուբարաշեն» ՔԿՀ-ի առանձին խցում:

«Ընթացքում որոշենք՝ կապված իր վիճակի հետ»,- ասաց պաշտպանը:

Նա նաև տեղեկացրեց, որ բողոքարկել է Ա.Ղուկասյանին՝ օգոտոստի 1-ին դատարանի կայացրած կալանավորելու որոշումը:

Ա. Ղուկասյանին մեղադրանք էր առաջադրվել 225-րդ հոդվածի 1-ին մասով (Զանգվածային անկարգություններ կազմակերպելը):
Հիշեցնենք, որ ՔԿ հատկապես կարևոր գործերի քննության գլխավոր վարչությունում հուլիսի 30-ին հարուցվել է  քրեական գործ՝ հուլիսի 29-ի ուշ երեկոյան Էրեբունի  և Նուբարաշեն վարչական շրջանում տեղի ունեցած անկարգությունների դեպքերի առթիվ։ Զանգվածային անկարգությունները կազմակերպելու և դրանց մասնակցելու կասկածանքով ձերբակալվել է 23 անձ: