Ձեր վստահելի աղբյուրը

Երևանի ավագանու «Բարև Երևան» դաշինքի անդամ Դավիթ Սանասարյանի  փաստաբան Ռոբերտ Ռևազյանն այսօր  դիմել է վերաքննիչ դատարան՝ բողոքարկելով իր պաշտպանյալին կալանավորելու որոշումը: Panorama.am-ի հետ զրույցում փաստաբանն ասաց, որ Դ. Սանասարյանին կալանավորելու անհրաժեշտությունը հիմնավորված չէ, առաջադրված մեղադրանքն անհիմն է:

«Միայն ոստիկանների հորինած, շինծու ցուցմունքներն են, տեսանյութով չամրագրեցին իրենց ցուցմունքները: Նույնիսկ եթե համարենք, որ ողջամիտ, հիմնավորված կասկած կա, որ նա անկարգություններ է կազմակերպել, միևնույնն է՝ կալանքի հիմքը բացակայում էր»,- հավելեց Ռ.Ռևազյանը:

Հիշեցնենք, որ Դ. Սանասարյանը բերման էր ենթարկվել հուլիսի 27-ին, օգոստոսի 1-ին դատարանի որոշմամբ կալանավորվել երկու ամսով:  Նրան  մեղադրանք է  առաջադրվել 225-րդ հոդվածի 1-ին մասով (Զանգվածային անկարգություններ կազմակերպելը):

Ինչ վերաբերում է Դ. Սանասարյանի առողջական վիճակին, ով հենց դատարանում՝ կալանքի միջնորդության քննության ժամանակ վատացել էր, փաստաբանն ասաց, որ երիկամների հետ կապված խնդիրներ ունի, սակայն հիմա վիճակն ավելի լավ է:

«Համեմատաբար լավ է իրեն զգում, բայց միանշանակ բուժման կարիք ունի»,- նշեց Ռ.Ռևազյանը: