Ձեր վստահելի աղբյուրը

Երեկ երեկոյան հայտնի կոմպոզիտոր, Ժողովրդական արտիստ Տիգրան Մանսուրյանը քրեակատարողական հիմնարկում հանդիպել է «Սասնա ծռերի» անդամ, գեղանկարիչ Աշոտ Պետրոսյանի հետ: Այդ մասին Panorama.am-ի թղթակցի հետ զրույցում ասաց Աշոտ Պետրոսյանի փաստաբան Արայիկ Պապիկյանը:

Հանդիպումից հետո Աշոտ Պետրոսյանը դադարեցրել է հացադուլը և թույլ տվել, որ իրեն բուժօգնություն ցուցաբերվի: Պապիկյանն ասաց, որ ինքը լիազորված չէ փոխանցել, թե ինչ է քննարկվել Պետրոսյան-Մանսուրյան հանդիպման ժամանակ և փոխարենը հավելեց.

«Երկու մտավորականների հանդիպում էր, որը մեկ ժամից ավելի է տևել: Եվ շատ լավ է, որ այդ հանդիպումից հետո Աշոտ Պետրոսյանը դադարեցրեց հացադուլը և թույլ տվեց, որ իրեն բուժօգնություն ցուցաբերվի՝ չէ՞ որ նրա ստացած հրազենային վնասվածքը ծանր էր»:

Ավելի վաղ Աշոտ Պետրոսյանի հետ հանդիպման պատրաստակամություն էր հայտնել նաև կոմպոզիտոր Ռոբերտ Ամիրխանյանը: Փաստաբանն ասաց, որ իրենք փորձել են, բայց չեն կարողացել կապ հաստատել Ամիրխանյանի հետ:

«Կփորձենք այսօր ևս, եթե ստացվի, լավ կլինի», -նշեց նա:

Աշոտ Պետրոսյանին մեղադրանքն առաջադրվել էր ՀՀ Քրեական օրենսգրի 219 հոդվածի 3-րդ մասի 1-ին կետի հատկանիշներով  (Կազմակերպված խմբի կողմից՝ շենքեր, շինություններ, տրանսպորտի, հաղորդակցության կամ կապի միջոցներ զավթելը) և 235-րդ հոդվածի 3-րդ մասով (կազմակերպված խմբի կողմից՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։