Ձեր վստահելի աղբյուրը

Այսօր Ազատության հրապարակում Հայաստանում գործող Զանգվածային լրատվության միջոցների ներկայացուցիչները հավաք էին կազմակերպել, որով պահանջում էին իրավապահ մարմիններից անհապաղ պատժել հուլիսյան դեպքերի ժամանակ լրագրողների նկատմամբ բռնություն իրականացրած անձանց:

Ակցիայի մասնակիցները հանդես եկան հայտարարությամբ, որին ԶԼՄ-ների ներկայացուցիչները միանում էին ստորագրելով հայտարարության տակ:

Հիշեցնենք՝ հուլիսի 29-ին Խորենացի փողոցում, այնուհետև՝ Սարի թաղում ոստիկանության և խաղաղ հավաքի մասնակիցների միջև բախում էր տեղի ունեցել, որի ժամանակ ծեծի, բռնության էին ենթարկվել նաև լրագրողներ: Այսօր միայն ՀՔԾ-ն հաղորդագրություն տարածեց՝ տեղեկացնելով, որ երկու անձ ձերբակալվել է լրագրողների մասնագիտական գործունեությունը խոչընդոտելու համար:

Ազատության հրապարակում էր նաև ոստիկանության հաարակայնության հետ կապերի վարչության պետ Աշոտ Ահարոնյանը, ով լրագրողներին տեղեկացրեց, որ վարչության «02» շաբաթաթերթը նույնպես միացել է հայտարարությանը, քանի որ այդ իրադարձությունների ժամանակ տուժել է նաև թերթի աշխատակիցը:

Լրագրողները հետաքրքրվեցին, թե ո՞ւմ կողմից է ոստիկանության աշխատակիցը վիրավորում ստացել, Ահարոնյանը արձագանքեց, որ քննությունը դրա պատասխանը կտա:

Լրագրողը Ահարոնյանից հետաքրքրվեց, թե արդյոք թիրախավորված հարձակում չի եղել լրագրողների նկատմամբ, և եղավ արձագանքը.

«Ես այդպիսի միտում չեմ տեսնում, որովհետև ոստիկանությունը առաջինն է շահագրգռված, որպեսզի նման դեպքեր չլինեն: Ի վերջո, ոստիկանությունն է պատասխանատու հասարակակակն կարգի ապահովման համար և նաև ոստիկանությունն է պատասխանատու այդ դեպքերը բացահայտելու համար և եթե դրանք չեն բացահայտվում կամ եթե դրանք տեղի են ունենում, բնականաբար տվյալ գերատեսչության հեղինակությանը վնասում է: Ինչո՞ւ պետք է դա ձեռնտու լինի պետական կառույցին: Դա ուղղակի անհեթեթ է», -հավելեց Ահարոնյանը:

Նկատենք, որ հայտարարության մեջ, որին միացել են մեծ թվով ԶԼՄ-ներ, ինչպես նաև ոստիկանության պաշտոնաթերթը, մասնավորապես նշվում է. «Բոլոր այն մարդիկ՝ անկախ իրենց կարգավիճակից, ովքեր համարձակվել են հուլիսի 29-ին նպատակաուղղված ձեռք բարձրացնել լրագրողների վրա, մասնագիտական գործիքներ կոտրել, բռնություն գործադրել, պետք է առավելագույնը 2 ամսվա ընթացքում ՀՀ քրեական օրենսգրքի 164 հոդվածով նախատեսված (Լրագրողի մասնագիտական օրինական գործունեությանը խոչընդոտելը) հատկանիշներով քրեական պատասխանատվության ենթարկվեն: Լրագրողական հանրությունը սպասում է կոնկրետ քայլերի, պետք է կալանավորումներ լինեն»։