Մոուրինյո. «Յանուզայն ինձ «Մանչեսթեր Յունայթեդում» է պետք»

Սպորտ 19:00 13/08/2016 Աշխարհում

«Մանչեսթեր Յունայթեդի» գլխավոր մարզիչ Ժոզե Մոուրինյոն հայտարարել է, որ կիսապաշտպան Ադնան Յանուզայը, ով վարձավճարով տեղափոխվել է «Սանդերլենդ», մտնում է իր պլանների մեջ: Այդուհանդերձ, որպեսզի բելգիացի ֆուտբոլիստն աճի, նրան մեկ մրցաշրջանով ուղարկել են այնպիսի ակումբ, որտեղ խաղային շատ ժամանակ կարող է ունենալ:

«Յանուզայը մտնում է իմ պլանների մեջ,- Մոուրինյոյի խոսքերը մեջբերել է «Սպորտ Էքսպրեսը»:- Հենց այդ պատճառով է նա վարձավճարով տեղափոխվել Պրեմիեր լիգայի մեկ այլ ակումբ: Նա տաղանդավոր խաղացող է, և ես ուզում եմ պայմաններ ապահովել, որպեսզի շարունակի աճել: Հույս ունեմ, որ ամեն ինչ լավ կընթանա, քանի որ նա պետք է «Մանչեսթեր Յունայթեդին»: Թիմում, որում հիմա կան Մարսիալը, Մխիթարյանը, Մատան, Յանգն ու Դեպայը, նա շատ քիչ խաղային ժամանակ կունենար: Չի կարելի եսասեր լինել, անհրաժեշտ է մտածել խաղացողների մասին: Հիմա Ադնանը ճիշտ տեղում է ու աշխատում է այնպիսի մարզչի գլխավորությամբ, որը սիրում է նրան»:

Մոուրինյոն մեկնաբանել է նաև այն փաստը, որ թիմի նորեկ Պոլ Պոգբան Իտալիայի առաջնությունում ստացած դեղին քարտերի պատճառով որակազրկվել է Պրեմիեր լիգայի 1 խաղով:

«Դեղին քարտերի հետ կապված իրավիճակի մասին գիտեի, սակայն չէի մտածում, որ դա կհանգեցնի որակազրկման Պրեմիեր լիգայում: Չգիտեի, թե որ մրցաշարի վրա կտարածվի որակազրկումը՝ Անգլիայի գավաթի խաղարկությա՞ն, թե՞ առաջնության վրա: Չգիտեի, ուստի սպասում էի որոշմանը»,- ասել է պորտուգալացի մասնագետը:

Ժոզե Մոուրինյոն խոսել է նաև առաջիկա մրցաշրջանում իր թիմի նպատակների մասին:

«Կարծում եմ՝ չեմպիոնի կոչման հավակնորդ ենք: Գիտենք, որ մյուսներն էլ նման ամբիցիաներ ունեն: Եթե չեմպիոն դառնա նա, ով մեզանից ուժեղ է, ուրեմն գերազանց է, սա ֆուտբոլ է: Բայց ներկա պահին «Մանչեսթեր Յունայթեդը» չի կարող այլ կերպ խոսել: Մենք կպայքարենք չեմպիոնի կոչման համար»,- նշել է Մոուրինյոն:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: