Ձեր վստահելի աղբյուրը

Օգոստոսի սկզբից Հալեպում ինտենսիվ հրթիռակոծության հետևանքով ավելի քան 100 խաղաղ բնակիչ է սպանվել, 700 մարդ էլ ստացել են տարբեր վնասվածքներ: ընդ որում, մահացածներից կեսից ավելին կանայք են ու երեխաներ: Այդ մասին հայտարարել են Հալեպի իշխանությունները, գրում է «РИА Новости» գործակալությունը:

Ըստ աղբյուրի, առավել վնասվել է քաղաքի հարավում գտնվող Ալ-Համադանիա շրջանը: Գորհայինները, գրավելով հրետանավորների ուսումնական կենտրոնը, սկսել են հրետակոծել Հալեպի հարավի բնակելի թաղամասերը: Օգոստոսի 10-ին գազի բալոնը՝ պայթուցիկ նյութերով նետել են հասարակական տրանսպորտի վրա, մի քանի արկ էլ նետվել է փոքրիկ շուկայի վրա: Դրա հետևանքով 14 մարդ մահացել է, 50-ն էլ ստացել էին տարբեր աստիճանի մարմնական վնասվածքներ:

Հալեպի արևմուտքում Քարյատ էլ-Անսարի թաղամասում «Ջեբհատ-ան-Նուսրա»-ի ահաբեկիչները գնդակահարել են գրոհայինների, ովքեր փորձել էին վայր դնել զենքը և ընտանիքների հետ միասին հումանիտար միջանցքով հեռանալ: Ահաբեկիչները 40 մարդու գնդակահարել են:

Ըստ աղբյուրի, Հալեպի Հաշիմ համալսարանական հիվանդանոցի պատանատոմներից մեկը լրագրողներին հայտնել է, որ օգոստոսի ընթացքում խաղաղ բնակիչների ոչնչացման համար նոր ստրատեգիա են մշակել՝ կիրառելով իրենց հզոր զինտեխնիկան: 

«Ես տեսել եմ հինգ մետրանոց փորված փոսեր, արկը դնում են դրանց մեջ ու կրակում: Այն կարող է վերացնել մեկ ամբողջական մեծ տուն: Իմ տունը ընկել է այդ արկի տակ», -պատմել է բժիշկը:

Քաղաքի բնակիչները՝ փոքրից մեծ, ծանր ողբերգություն են ապրում:

«Ես 17 տարեկան եմ, ավարտել եմ 11-րդ դասարանը: Քնած էի տանը, բայց արթնացա արյան մեջ: Չէի հասկանում՝ ինչ է կատարվում: Տեղափոխեցին հիվանդանոց, վիրահատեցին: Հայրս, եղբայրներս նույնպես վնասվածքներ էին ստացել», -պատմել է տեղի բնակիչներից Մալիկ Քասաբը:

Ալ-Համադի թաղամասի բնակչուհիներից Նաջուա Քաթվին վկայել է, որ ահաբեկիչները քաղաքի վրա կրակում են հրետանիներից, գազային բալոններով ու ինքնաշեն հրթիռներով:

«Արկերից մեկն ընկել է առևտրային կետի վրա: Տիրոջ ոտքը կտրվեց: Բեկորները ընկան մեր տան պատշգամբին: Հազիվ կարողացա թաքցնել երեխաներից», -պատմել է կինը:

Քաղաքի հիվանդանոցներում ծանր վնասվածքներ ստացած հարյուրավոր մարդիկ կան, որոնք որակյալ մասնագիտական բուժօգնության կարիք են զգում:

Սիրիայում զինված հակամարտությունը շարունակվում է 2011 թվականից: ՄԱԿ-ի տվյալներով այս հակամարտության հետևանքով 220 հազարից ավելի մարդ է մահացել: