Ձեր վստահելի աղբյուրը

««Սասնա ծռեր» խմբի անդամ Պավել Մանուկյանի ոտքի բուժումն ընթացքի մեջ է, և այս պահին մենք չենք մտածում դրա կարճանալու մասին», -Panorama.am-ի թղթակցի հետ զրույցում մենկանաբնելով Մանուկյանի ոտքի հնարավոր կարճանալու մասին փաստաբանների հայտարարությունները, ասաց «Էրեբունի» բժշկական կենտրոնի գործադիր տնօրեն Միքայել Մանուկյանը:

Նրա ներկայացմամբ, Պավել Մանուկյանին երկրորդ անգամ կվիրահատեն մեկ-երկու ամիս անց, երբ վերքը համեմատաբար կլավանա:

«Մանուկյանը բազմաբեկոր վնասվածք է ստացել և նրա ոտքին տեղադրված է դրսային ֆիքսացիա, հետո կկատարվի երկրորդ վիրահատությունը և կտեղադրվի հատուկ պլաստիկա: Բայց դա հիմա չպետք է արվի, այլ մեկ-երկու ամիս անց: Դրանից հետո կքայլացնենք Մանուկյանին, կերևա՝ ինչ է լինում: Հիմա նման բան չկա», -ներկայացրեց մասնագետը՝ հորդորելով ոչ մասնագիտական հայտարարություններ չանել և կրքեր չբորբոքել:

Մանուկյանը նաև ասաց, որ կրկնակի վիրահատության են ենթարկվելու նաև նույն խմբից Աշոտ Պետրոսյանը, Հովհաննես Հարությունյանը, Արամ Մանուկյանը և Արսեն Լամբարյանը:

«Արսեն Լամբարյանի վնասվածքը բավական լուրջ է, բայց տեղեկություն ունեմ, որ կամաց-կամաց վերքը լավացել է: Նրան նույնպես սպասվում է երկրորդ վիրահատություն, բայց մի քանի ամիս հետո: Նրանք արտաքին ֆիքսացիա անող սարքերով կքայլեն, որից հետո հատուկ մետաղական կոնստրուկցիաներով հիմնովի ֆիքսում պետք է արվի: Դա միանգամից չէր կարելի անել, որովհետև հրազենային վերքի ժամանակ չի կարելի վերքի մեջ բան դնել, որովհետև ինֆեկցիա կլինի; Դրա համար հիմա արտաքին ֆիքսացիա է արվում», -բացատրեց Միքայել Մանուկյանը:

Վերջինը դեռ բարկացած էր օրերս շրջանառվող այն հայտարարությունից, թե բժիշկները ցանկացել են կտրել Պավել Մանուկյանի ոտքերը, բայց նրանց թույլ չեն տվել դա անել և հորդորեց ոչ մասնագիտական հայտարարություններ մարդկանց առողջական խնդիրների վերաբերյալ չանել:

«Այդ խմբի հետ 7-8 վիրաբույժ է աշխատել և իրոք, մենք ոտքը փրկել ենք, հասկանում ե՞ք: Իհարկե, Պավել Մանուկյանին ու նրա որդուն անհրաժեշտ է երկրորդ վիրահատությունը, ու մենք դա անելու ենք», -նկատեց Մանուկյանը:

Նրա խոսքով, Աշոտ Պետրոսյանի և Հովհաննես Հարությունյանի վիրահատությունները կարվեն ավելի շուտ, քան Մանուկյաններինն ու Լամբարյանինը:

«Բոլորի վիրահատություններն էլ անելու ենք, ինչի՞ մասին է խոսքը», -ընդգծեց «Էրեբունի» ԲԿ-ի տնօրենը: