ՀՔԾ պետը ԱՄՆ դեսպանին վստահեցրել է, որ ՊՊԾ գնդի վերաբերյալ քրգործերով կատարվում է «օբյեկտիվ քննություն»

Իրավունք 17:59 16/08/2016 Հայաստան

Այսօր ՀՀ հատուկ քննչական ծառայության պետ, արդարադատության գեներալ-լեյտենանտ Վահրամ Շահինյանի և ՀՀ-ում ԱՄՆ արտակարգ և լիազոր դեսպան պարոն Ռիչարդ Միլսի հետ հանդիպման ժամանակ ամերիկացի դիվանագետը հետաքրքրվել է նախորդ ամսին ոստիկանության պարեկապահակային ծառայության գնդի տարածքում, ինչպես նաև այլ վայրերում տեղի ունեցած բռնությունների, լրագրողների ու փաստաբանների օրինական գործունեությանը խոչընդոտելու, ինչպես նաև զինված խմբի վերաբերյալ քննվող քրեական գործերի նախաքննության ընթացքից:

ՀՔԾ լրատվական ծառայության տեղեկացմամբ, ՀՀ հատուկ քննչական ծառայության պետ Վ. Շահինյանը ընդգծել է, որ հարուցված և քննվող քրեական գործերով կատարվում է լրիվ, բազմակողմանի և օբյեկտիվ քննություն:

«Կատարվում են անհետաձգելի քննչական և դատավարական գործողություններ՝ կատարված առերևույթ հանցագործությունների բոլոր հանգամանքները մանրակրկիտ ուսումնասիրելու, մեղավոր անձանց հայտնաբերելու և քրեական պատասխանատվության ենթարկելու համար»,- նշել է Վահրամ Շահինյանը:

Ըստ աղբյուրի, հանդիպման ընթացքում ԱՄՆ արտակարգ և լիազոր դեսպանը փաստել է. «Գոհացնող է, որ ՀՀ հատուկ քննչական ծառայությունը մանրակրկիտ ու արհեստավարժ քննություն է իրականացնում Էրեբունու ոստիկանության շենքի գրավման և ՀՀ քաղաքացիների ու լրագրողների դեմ ուղղված ոստիկանական չարաշահումների դեպքերով»:

Վահրամ Շահինյանը նշել է նաև, որ հաշվի առնելով հանրության հետաքրքրությունը հիշյալ քրեական գործերի նկատմամբ, պարբերաբար հանրության ուշադրությանն է ներկայացվում տեղեկատվություն՝ քրեական գործերով իրականացված քննչական և դատավարական գործողությունների մասին:

Հարակից հրապարակումներ`

«Սասնա ծռերի» և Սեֆիլյանի վերաբերյալ միացված գործերով մեղադրյալ է ներգրաված 60 անձ, 50-ը կալանավորված են

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: