Արամ Մանուկյանը ներկա կլինի դատական նիստին

Իրավունք 14:03 18/08/2016

Արամ Մանուկյանը ներկա կլինի դատական նիստին

Այսօր Վերաքննիչ քրեական դատարանում «Սասնա ծռեր» խմբի անդամ իր կալանքի որոշման բողոքարկման գործով դատական նիստին Արամ Մանուկյանը դատարան չի բերվել:

Դատական նիստից հետո Մանուկյանի պաշտպան, փաստաբան Ինեսա Պետրոսյանը տեղեկացրեց, որ ինքը միջնորդել է դատարանին, որպեսզի բողոքի քննությանը ներկա գտնվի նաև իր պաշտպանյալը, և դատարանը բավարարել է միջնորդությունը:

Հաջորդ դատական նիստին, որը տեղի կունենա օգոստոսի 23-ին, փաստաբանի խոսքով, ներկա կգտնվի նաև Արամ Մանուկյանը:

Ինեսա Պետրոսյանը տեղեկացրեց նաև, որ նախաքննական մարմնի ներկայացրած կալանքի միջնորդության քննարկման ժամանակ ընդհանուր իրավասության առաջին ատյանի դատարանում ևս Արամ Մանուկյանի ներկայությունն ապահովված չէր, քանի որ նա նոր էր վիրահատվել:

Վերաքննիչ դատարան ներկայացված բողոքում փաստաբանը նշել է, որ Արամ Մանուկյանը իր առողջական վիճակից ելնելով հնարավորություն չունի խուսափել քննությունից ու խոչընդոտել քննությանը:

«Նախաքննական մարմինն էլ ասում է, թե Արամ Մանուկյանը ծանր հանցանք է գործել, ինչն էլ միակ հիմքն է կալանավորելու համար: Մենք էլ պնդում ենք, որ Արամ Մանուկյանն ունի անբասիր վարքագիծ, ու բացառվում է, որ նա կխոչընդոտի քննությանը», -հավելեց պաշտպանը:

Ինչ վերաբերում է Արամ Մանուկյանի առողջական վիճակին, Ինեսա Պետրոսյանն ասաց, որ երեկ տեսակցել է «Դատապարտյալների հիվանդանոց» ՔԿՀ-ում գտնվող իր պաշտպանյալներին:

«Արամ Մանուկյանի վիճակը փոքր ինչ բարելավել է, քան Պավել Մանուկյանի վիճակն է: Բժիշկների ու հենակների օգնությամբ նա կարողացել է մեկ-երկու քայլ առողջ ոտքով առաջ գնալ: Մյուս ոտքը մի քանի ամիս չի կարող գետնին դնել»,- փոխանցեց տիկին Պետրոսյանը:

Հարակից հրապարակումներ`

Պավլիկ և Արամ Մանուկյանների փաստաբանը բողոքարկելու է կալանքի որոշումները

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: