Ձեր վստահելի աղբյուրը

Այսօր կառավարության նիստում Արդարադատության նախարար Արփինե Հովհաննիսյանը կառավարության հաստատմանը ներկայացրեց Մարդու իրավունքների եվրոպական դատարանում «Սիմոնյանն ընդդեմ Հայաստանի» գործով փոխհատուցման վերաբերյալ որոշման նախագիծը, որի համաձայն Հայաստանի կառավարությունը, որպես փոխհատուցում, ՄԻԵԴ-ի վճռով պետք է վճարի 18,225 եվրոյին համարժեք ՀՀ դրամ

««Սիմոնյանն ընդդեմ Հայաստանի» գործով 2016 թվականի ապրիլի 7-ի վճռի պահանջները կատարելու նպատակով Հայաստանի Հանրապետության կառավարության պահուստային ֆոնդից Արդարադատության նախարարությանը հատկացնել 18,255 եվրոյին համարժեք ՀՀ դրամ`վճռով սահմանված արդարացի հատուցման համար»,- ներկայացրեց նախարար Արփինե Հովհաննիսյանը:

Իսկ գումարի վճարման վերջնաժամկետը, ըստ որոշման նախագծի, սահմանվում է այս տարվա հոկտեմբերի 7-ը:

Նիստը վարող վարչապետ Հովիկ Աբրահամյանը մինչև նախագիծը հաստատման ներկայացնելը Ֆինանսների նախարարությանը հանձնարարեց հաշվարկել՝ պարզելու, թե վերջին երեք տարվա ընթացքում ՄԻԵԴ-ի վճիռների համար որքան գումար է հատկացվել:

«Ես հանձնարարում եմ Ֆինանսների նախարարությանն ու Կառավարության աշխատակազմին քննարկել, թե որքան գումար ենք հատկացրել ՄԻԵԴ-ի որոշումների համար 2014–2015 թվականների և այս տարվա ութ ամիսների ընթացքում: Եվ ընդհանրապես, այդ սխալ որոշումների համար ինչ-որ մեկը պե՞տք է պատասխան տա, թե՞ ոչ: Պետք է հաշվարկել և հասկանալ: Այդ հարցերը մանրամասն քննարկենք: Արդարադատության նախարարությունը ևս թող քննարկի»,– հավելեց Աբրահամյանը: