Ձեր վստահելի աղբյուրը

ՀՀ Ազգային ժողովի նախագահ Գալուստ Սահակյանը շնորհավորական ուղերձ է հղել Բրազիլիայի  Դաշնային Հանրապետությունում ընթացող 31-րդ ամառային օլիմպիական խաղերում Հայաստանը ներկայացնող հաղթանակած,  ոսկե ու արծաթե մեդալներ նվաճած մարզիկներին:  ԱԺ հասարակայանության և տեղեկատվության միջոցների հետ կապերի վարչության ներկայացրած շնորհավորական ուղերձում մասնավորապես ասված է.

«Սրտանց շնորհավորում եմ «Ռիո 2016»-ում  փառահեղ  հաղթանակներ  կերտած  մեր մարզիկներին.  Արթուր Ալեքսանյանին` 31-րդ ամառային օլիմպիական խաղերի  չեմպիոնի բարձր պարգեւը նվաճելու համար,  փոխչեմպիոններ  Միհրան Հարությունյանին,  Գոռ Մինասյանին  և Սիմոն Մարտիրոսյանին:  Սիրելի հայորդիներ,  հպարտ ենք ձեզնով՝  օլիմպիական խաղերում ձեր ցուցաբերած  գրագետ ու պրոֆեսիոնալ մրցելույթներով: Շնորհիվ ձեզ հայոց եռագույնը կրկին բարձրացավ  և  ի  լուր աշխարհի հնչեց հայոց օրհներգը: 

Շնորհավորում եմ  նաև համայն հայությանը, քանզի հպարտ ենք ձեզնով ու վստահ ենք, որ հաղթանակները շարունակական կլինեն ապագայում  ևս  մյուս միջազգային  մարզական միջոցառումներում:  Վստահ եմ, որ ձեր հաղթանակները օրինակ կլինեն Հայաստանի ապագա չեմպիոնների համար: Եվս մեկ անգամ շնորհավորելով հաղթանակների կապակցությամբ` ձեզ հարգելի մարզիկներ, մաղթում եմ նորանոր վերելքներ ու  նվաճումներ: Իսկ այն, որ ձեր հաղթանակներն ուղղեցիք սահմանին կանգնած մեր քաջորդիներին  և ապրիլյան պատերազմում զոհված հերոս տղաներին,  դա վկայում է ձեր հայրենասիրության ու մարդկային վեհ արժեքների մասին: Փառք ու պատիվ ձեզ,  սիրելի մարզիկներ»: