Ձեր վստահելի աղբյուրը

Այսօր Շիրակի մարզի ընդհանուր իրավասության դատարանի արտագնա նիստում գյումրեցի Ավետիսյանների ընտանիքի 7 անդամների սպանության գործով մեղադրյալ ռուս զինծառայող Վալերի Պերմյակովի փաստաբան Էդուարդ Աղաջանյանը ներկայացրել է պաշտպանական ճառը:

Երբ դատարանը հարցերց, թե արդյոք ամբաստանյալը ունի՞ ցանկություն ներկայացնելու իր վերջին խոսքը, Պերմյակովը հրաժարվեց խոսել: Իր դատավարության գրեթե ողջ ընթացքում Պերմյակովն այդպես էլ լուռ մնաց, իսկ հարցերին պատասխանում էր՝ կցկտուր, կարճ:

Նախորդ դատական նիստում, հիշեցնենք, մեղադրական ճառով հանդես եկավ մեղադրող Գևորգ Գևորգյանը՝ միջնորդելով Պերմյակովին մեղավոր ճանաչել մեղադրանքի ողջ ծավալով ու դատապարտել ցմահ ազատազրկման:

Պերմյակովի նկատմամբ քրեական գործը հարուցվել էր ՀՀ քրեական օրենսգրքի մի քանի հոդվածներով՝ 104-րդ հոդվածի 2-րդ մասի 1-ին, 5-րդ և 8-րդ կետերով՝ առանձին դաժանությամբ, ավազակությամբ զուգորդված երկու կամ ավելի անձանց սպանություն, 175-րդ հոդվածի 2-րդ մասին 3-րդ և 4-րդ կետերով՝ բնակարան ապօրինի մուտք գործելով, զենքի գործադրմամբ ավազակություն և 34-329-րդ հոդվածի 1-ին մասով՝ պետական սահմանն ապօրինի հատելու փորձ: