Ձեր վստահելի աղբյուրը

Ինձ կալանավորելու համար հիմքեր չկային, դա ամբողջությամբ ապօրինի էր ու բացառապես քաղաքական հետապնդում իմ նկատմամբ: Այդ մասին այսօր լրագրողների հետ հանդիպմանը հայտարարեց «Ժառանգություն» կուսակցության փոխնախագահ Արմեն Մարտիրոսյանը, որն օրերս էր Վերաքննիչ դատարանի որոշմամբ ազատվել կանալքից: Նրա նկատմամբ խափանման միջոց կալանքը փոխարինվել էր գրավով:

Ներկայացնելով հուլիսի 17-ին ոստիկանության ՊՊԾ գնդի գրավմանի օրից հետո Խորենացի փողոցում և Սարի թաղում ստեղծված իրավիճակի վերաբերյալ իր գնահատականը, Մարտիրոսյանն ասաց, որ այդ օրերին իրենց գործողությունները ուղղված են եղել այն բանին, որ «որևէ հրահրում, սադրանք չլինի»:

«Մեր քայլը ընդամենը հոգեբանական ճնշում էր իշխանությունների վրա, որպեսզի ուժային գործողություն չիրականացվի «Սասնա ծռերի» անդամների վրա, մեր զորակցությունն ենք հայտնել Սասնա ծռերին, և եթե չլինեին ոստիկանության պատժիչ գործողությունները, որևէ խնդիր չէր առաջանա», -հայտարարեց Մարտիրոսյանը:

Անդրադառնալով իր մասին Ազգային ժողովի պատգամավոր, «Քաղաքացիական պայմանագիր» կուսակցության անդամ Նիկոլ Փաշինյանի հայտարարություններին, որոնք նա ասել է 1in.am-ին տված հարցազրույցում, Արմեն Մարտիրոսյանն ասաց, որ Փաշինյանն ըստ էության ասել է այնպիսի բաներ, որպիսին ասել են ոստիկանները իր դեմ իրենց տված ցուցմունքներում:

«Նա արել է այնպիսի հարցադրումներ, որոնք իրականությանը չեն համապատասխանում:
Նաև հարցադրումներ է արել, որոնք ոստիկանները նույնիսկ չեն ասել, էլ չեմ ասում իշխանության ներկայացուցիչների մասին, որոնք այդ օրերի ընթացքում իրենց զուսպ են պահել», -հայտարարեց Մարտիրոսյանը:

«Ժառանգության» ներկայացուցիչը վիրավորված էր Փաշինյանի վարքագծից, և նշեց, որ «քաղաքական գործչին սազական չէ» անազատության մեջ գտնվող գործընկերոջը վերագրել մտքեր, որոնք իրենը չեն:

Այդուհանդերձ, Մարտիրոսյանը շարունակեց անդրադառնալ Փաշինյանի հայտարարություններին և Փաշինյանի հարցադրմանը, որ կրիմինալի ձեռքը չհայտնվի, բա ո՞ւմ ձեռքին պետք է լիներ զենքը՝ Արմեն Մարտիրոսյանը արձագանքեց՝ ներկայացնելով իր տարբերակները.

«Զենքը գտնվում է այն ոստիկանների վերահսկողության ներքո, որոնք անցնում են ժողովրդի կողմը: Գրեթե 20 հազար ոստիկանության պարագայում ընդամենը մի քանի հարյուր ոստիկան են, որ մնացել են իշխանություններին պաշտպան: Զենքը կարող էր վերահսկել Երևանում գտնվող զինվորական ստորաբաժանումներից որևէ մեկը: Զենքը կարող էր վերահսկել ԱԱԾ-ի որևէ ստորաբաժանում: Զենքը կարող էր վերահսկել Արտակարգ իրավիճակների նախարարության աշխատակիցներից մեկը, արտակարգ իրավիճակներում նրանք ևս ուժային կառույց են համարվում և վերջապես, զենքը կարող էր վերահսկվել ժողովրդական միլիցայի ներկայացուցիչների և ուժային կառույցների համատեղ ջանքերով»:

Նա ասաց, որ սրբերի դասին չի դասվում, շատ մեղավոր անձ է, հետևաբար հորդորեց չմեկնել իր խոսքերը: «Բացարձակ կարիքը չկա իմ խոսքերի մեկնիչը լինելու», -Փաշինյանին ակնկարկելով հայտարարեց Մարտիրոսյանը:

Քաղաքական գործիչը, որը մեղադրվում է մասսայական անկարգություններ կազմակերպելու համար, ընդգծեց, որ իրենց պայքարը եղել է քաղաքական, չի հրաժարվում իր քաղաքական սկզբունքներից ու իր համար անընդունելի են գոտկատեղից ներքև հարվածները:

«Ես կարող եմ բաց ճակատով իմ մոտեցումն ասել: Ես իշխանություններին կամ իրավապահներին ոչինչ չեմ ապացուցելու, բայց եթե փորձելու են մեկնել իմ խոսքերը՝ այն էլ հեռու իրականությունից, այդ դեպքում ես պետք ներկայացնեմ իրականությունը», -հավելեց Մարտիրոսյանը: