Ձեր վստահելի աղբյուրը

«Սասնա ծռեր» խմբի անդամ, «Դատապարտյալների հիվանդանոց» ՔԿՀ-ում գտնվող Հովհաննես Հարությունյանի նկատմամբ տեղի է ունենում խոշտանգում, քանի որ նրան պատշաճ բուժօգնություն չի տրամադրվում: Այդ մասին այսօր լրագրողների հետ հանդիպմանը հայտարարեց Հարությունյանի փաստաբան Արա Ղարագյոզյանը:

Նա տեղեկացրեց, որ տեսակցել է իր պաշտպանյալին և իմացել, որ գիշերը Հովհաննեսն իրեն վատ է զգացել, սակայն նրա կողքին որևէ բուժակ չի եղել՝ օգնելու համար:

«Այս գիշեր նա ցավերից բղավել է, բժիշկները կողքին չեն եղել և այլ հնարավորություն չի ունեցել դռան ուղղությամբ իրեր է նետել, որպեսզի գան ու բուժօգնություն ցուցաբերեն», -ներկայացրեց փաստաբանը:

Նրա խոսքով, բժիշկները հապաղում են և անհրաժեշտ վիրահատությունը չեն կատարում, և հրազենային վիրավորում ստացած ոտքի մատները չի կարողանում շարժել:

«Մենք՝ պաշտպաններս տեսնում ենք, որ Հովհաննես Հարությունյանի վիճակը օրըստօրե վատանում է, և ցավազրկող ներարկումները նույնիսկ օգուտ չեն տալիս: Պահանջում ենք վիրահատեն, բայց ասում են, որ ժամանակը չէ: Մենք միտում ենք տեսնում՝ խոշտանգման են ենթարկում՝ փորձելով ցավերի մեջ պահել», -հայտարարեց Ղարագյոզյանը:

Նա տեղեկացրեց, որ դիմել են Կարմիր խաչի մասնագետներին և առաջիկա օրերին նրանք կայցելեն «Սասնա ծռեր» խմբի վիրավոր անդամին:

Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը ևս պնդեց, որ Հովհաննես Հարությունյանի նկատմամբ խոշտանգում է իրականացվում:

«Մարդը տանջվում է ցավերից: Սա արժանապատվությունը նվաստացնող երևույթ է ու Մարդու իրավունքների եվրոպական դատարանի նախադեպային որոշմամբ համարվում է խոշտանգում», -հայտարարեց Սաքունցը ընդգծելով, որ Արդարադատության նախարարը և ՔԿՀ վարչության պետը այդ ամենի համար ուղղակի պատասխանատվություն են կրում:

Նշենք, որ ավելի վաղ «Էրեբունի» ԲԿ գործադիր տնօերն Միքայել Մանուկյանը Panorama.am-ին ասել էր, որ Հովհաննես Հարությունյանի վիրահատությունը պետք է շուտ կատարվի: