Ձեր վստահելի աղբյուրը

Նոր ուսումնական տարվան ընդառաջ Երևանի պետական համալսարանում  ուսուցման համակարգում որոշ մասնագիտությունների ուսման վարձերը կբարձրանան: Օրինակ՝ ԵՊՀ «Սերվիս» մասնագիտության վարձաչափը առկա և հեռակա ուսուցման համար այս տարի կազմում է համապատասխանաբար 540 և 432 հազար դրամ: Նախորդ տարի այն կազմել է 500 և 400 հազար դրամ:

«Միջազգային հարաբերություններ»  մասնագիտության վարձաչափը նախորդ տարի եղել է առկա ուսուցման համար 600 հազար դրամ, հեռակա՝ 480 հազար դրամ: Այս տարի առաջին կուրս ընդունվողների համար այն կազմում է համապատասխանաբար 650 և 520 հազար դրամ:

Մայր բուհում «Տնտեսագիտություն» մասնագիտության դեպքում առաջին կուս ընդունվածները առկա ուսուցման համար կվճարեն 650 հազար դրամ վարձավճար, իսկ հեռակա ընդունվողները  520 հազար դրամ: Նախորդ տարի այն եղել է 600 և 480 հազար դրամ:

«Իրավագիտություն» մասնագիտության դեպքում այս տարի առկա ուսուցման վարձավճարը 870 հազար դրամ է, նախորդ տարի եղել է 800 հազար դրամ: Հեռակայի դեպքում՝ 696 հազար դրամ, նախորդ տարի 640 հազար դրամ է եղել:

Նշենք, որ բարձրացված վարձավճարները վերաբերում են միայն այս տարի բուհ ընդունվողներին:
ԵՊՀ 2016/17 ուստարվա ուսման վարձի չափն ըստ մասնագիտությունների և կուրսերի՝ այստեղ:

ԵՊՀ-ում ուսման վարձերի բարձրացման հետ կապված Panorama.am-ը փորձեց մեկնաբանություն ստանալ ԵՊՀ ռեկտոր Արամ Սիմոնյանից, ով հերքեց՝ ասելով. «Այդպիսի բան չկա: Ես արձակուրդում եմ, աշխատանքի եմ վերադառնում օգոստոսի 24-ից հետո, այդ ժամանակ մանրամասն կպատասխանեմ:  Դիմորդ չունենք, հեռակա այս տարվա համար չի էլ լինելու: Մենք չենք կարողանում նույնիսկ ցերեկայինը լրացնել, ուր մնաց հեռակայի մասին մտածենք ու վարձն էլ բարձրացնենք: Այս տարի հեռական չենք լրացնում, մենք ինչպե՞ս կարող ենք վարձերը բարձրացնել»:

Բարձրագույն և հետբուհական մասնագիտական կրթության վարչության մասնագիտական կրթության  կազմակերպման և համակարգման բաժնի պետ Սասուն Մելիքյանն էլ մեզ հետ զրույցում նշեց, որ ուսման վարձի չափը որոշում են բուհերը՝ կառավարության որոշման  հաստատված կարգի համաձայն. «Պետական բուհերը վճարովի ուսուցման համակարգի վարձի չափը իրենք են որոշում: Նախարարությունը կետ ունի, որ կրթական աստիճանների հավատարմագրման արդյունքների ուսման վարձի առավելագույն շեմը սահմանելու մասին, որը բուհերը չեն կարող անցել»:

Իսկ թե ինչո՞վ է պայմանավորված վարձավճարների բարձրացումը նա պատասխանեց. «Նրանք տարբեր հաշվարկներ են անում, սկսած էներգիայի, ջրի հաշվարկներից մինչև դասախոսներ վարձատրություն: Սակայն շատ կարևոր է նաև հասարակության սոցիալական վիճակը հաշվի առնել, քանի որ դիմոդները պակասում են ուսման վարձի բարձրացման հետ կապված»:

2016-17 ուստարվա ընդունելության քննությունների, տեղերի և ուսման վարձաչափերի մասին կարող եք ծանոթանալ նաև ՀՀ կառավարության գնահատման և թեստավորման կենտրոնի պաշտոնական կայքում: