Ձեր վստահելի աղբյուրը

«Այո, թերևս, ես իսկապես երջանիկ մարդ եմ: Իսկ գիտե՞ս, թե ինչն է պակասում կատարյալ երջանկության համար: Հայրենիքում լինելն ու Արարատ լեռը տեսնելը»,- տարիներ առաջ ասել է ամերիկյան էստրադայի խորհրդանիշներից մեկը դարձած «Strangers in the Night» լեգենդար երգի հեղինակը, ով նաև ստեղծել է նույնչափ լեգենդար «Avo» սիգարային բրենդը՝ Ավո Ուվեզյանը:

Նա հպարտ է, որ հայ է: Թեև արդեն 90 տարեկան է, ով դժվարին կյանքից հետո հասել է բարձունքների, ձեռք բերել համաշխարհային հռչակ, սակայն դեռ ունի երազանք՝ լինել Հայաստանում:

«Անպատճառ պետք է գամ Հայաստան»,- վերջերս ԱՄՆ-ում Ավո Ուվեզյանի ծննդյան 90-ամյակի կապակցությամբ  Հայաստանի վարչապետի հուշամեդալով պարգևատրման արարողության ժամանակ ասել է նա:

Երգիչ Արման Հովհաննիսյանը պարգևատրման արարողությունից մի հատված տեղադրել է ֆեյսբուքյան իր էջում:

auroraprize.com կայքից տեղեկանում ենք, որ Ավո Ուվեզյանի հայրը` Հակոբը, ծագումով Մարաշից է, իսկ մայրը` Սաթենիկը, ծնվել է Խարբերդում: Ծնողները հասցրել են գաղթել Թուրքիայից հայերի զանգվածային ջարդերից առաջ: Ավոն արդեն Բեյրութում է ծնվել: Ընտանիքը երաժշտական էր: Կոմպոզիտորի և երգչուհու որդին ի սկզբանե գիտեր, որ իր ապագան կապված է լինելու նոտաների ու դաշնամուրի հետ:

Ուվեզյանի հաջողությունները բիզնեսի ոլորտում նույնչափ զգալի էին, որքան և ստեղծագործական ասպարեզում: Սիգարների արտադրության և մարկետինգի ոլորտում որոշակի փորձ ունեցող իր ընկերոջ` Ժակ Մելքոնյանի համառ խորհրդով նա որոշել էր ոսկերչությունը փոխարինել ծխախոտային բիզնեսով: Սեփական արտադրանքն Ավոն անվանել է իր անունով, որը հայերենում նշանակում է «բարի լուր»: Մի օր Ֆիդել Կաստրոն անձամբ զանգահարել է Ուվեզյանին և խնդրել «Avo» սիգարների մի քանի տուփ ուղարկել իրեն: Իսկ Ջորջ Բուշ ավագը մի անգամ մոտեցել է Ավոյին հյուրանոցում` ծանոթանալու իր սիրած սիգարների արտադրողի հետ: