Ձեր վստահելի աղբյուրը

Հոկտեմբերի 2-ին Գյումրիում կայանալիք ավագանու ընտրություններին Գաղափարական լիբերալների ալյանս (ԳԱԼԱ) կուսակցությունը կմասնակցի միայնակ և ցուցակը ամենայն հավանականությամբ, կգլխավորի կուսակցության նախագահ Վահան Խաչատրյանը: Այդ մասին Panorama.am-ին տեղեկացրեց կուսակցության վարչության անդամ Արմենուհի Վարդանյանը:

«Նա կլինի միայն ԳԱԼԱ-ի թեկնածուն», -հավելեց Վարդանյանը:

Սահմանադրության փոփոխությամբ պայմանավորված Գյումրիում և Վանաձորում քաղաքապետին կընտրեն ավագանու ընտրությունների արդյունքում: Ընտրություններին այստեղ կուսակցությունները մասնակցում են համամասնական ցուցակներով:

Նշենք, որ ԳԱԼԱ կուսակցությունը դեռ ստեղծվելուց առաջ խորհրդակցություններ էր անցկացնում ընդդիմադիր դաշտի կուսակցությունների հետ՝ Գյումրիի քաղաքապետի ընտրություններում միասնական թեկնածուով հանդես գալու համար: Սակայն խորհրդակցությունները, փաստորեն, արդյունք չտվեցին:

«Ի սկզբանե մենք նշել էինք, որ մեզ համար ցանկալի է, որ տեղի ունենա ընդդիմադիր դաշտի կոնսոլիդացիա: Դա լավագույն տարբերակը կլիներ: Հիմա, ինչպես տեսնում եք բազմաթիվ կուսակցություններ Գյումրիի նման փոքր քաղաքում պայքարելու են քաղաքապետի պաշտոնի համար»,- նկատեց ԳԱԼԱ-ի ներկայացուցիչը:

Հարցին, թե ի՞նչը խանգարեց, որ միասնական ցուցակով ընդդիմադիր դաշտը ներկայանար Գյումրիի քաղաքապետի ընտրություններում, Արմենուհի Վարդանյանը պատասխանեց. «Ես կարծում եմ, որ ավելի շատ ամբիցիաները խանգարեցին, ոմանց նաև՝ իշխանությունները խանգարեցին: Իշխանությունն իր հերթին մեզ հետ զուգահեռ աշխատում էր, որ այդ համախմբումը տեղի չունենա, որովհետև իրենք վախենում էին այդ համախմբումից: Բացի այդ, շատ խանգարեցին քաղաքական ուժերի ամբիցիաները, որովհետև բոլոր քաղաքական ուժերը համաձայն էին երկկողմանի դաշինքի, բայց մեր նպատակը համախմբելն էր: Երբ տրվում էր երրորդ կամ մյուս կուսակցության անունը, հայտնվում էին տարաձայնություններ, ամբիցիաներ և այլն»:

Գյումրիում քաղաքապետի ընտրությունների համար պաշտոնապես հայտարարել են, որ մասնակցելու են Հանրապետական կուսակցությունը, որի համամսանական ցուցակը կգլխավորի գործող քաղաքապետ Սամվել Բալասանյանը, «Բարգավաճ Հայաստան» կուսակցությունը, որի համամասնական ցուցակը կգլխավորի Վարդևան Գրիգորյանը: Նախկին Օրինաց երկիր, այժմ Հայկական Վերածնունդ կուսակցությունը պաշտոնապես չի հայտարարել, բայց որոշ տեղեկություններով, կմասնակցի Գյումրիի ընտրություններին, իսկ թեկնածուն կլինի ԱԺ պատգամավոր, գյումրեցի Հովհաննես Մարգարյանը:

Այս պարագայում ինչպե՞ս է ԳԱԼԱ-ն պատկերացնում պայքարը հարցին, Արմենուհի Վարդանյանն ի պատասխան ասաց, որ իրենք շատ լավ էին պատկերացնում՝ ինչպիսին կլինի իրավիճակը ու հավելեց.

«Կուսակցություն ստեղծելը մեզ համար ինքնանպատակ չէր, ցուցակներում հայտնվելը մեր նպատակը չէր: Մեր նպատակը եղել է Գյումրիում ընդդիմադիր դաշտի համախմբումը: Մեր նախանշած սցենարում կար տարբերակը, որ հնարավոր է համախմբում չստացվի, հետևաբար շարունակելու ենք պայքարը միայնակ»:

Նկատենք՝ Կենտրոնական ընտրական հանձնաժողովի սահմանած ժամանակացույցի համաձայն, Գյումրիում ընտրություններին մասնակցող կուսակցությունները գրանցման համար ներկայացնելու են օգոստոսի 18-ից մինչև 28-ը, իսկ գրանցումը կատարվում է 28-ից մինչև սեպտեմբերի 2-ը: Նախընտրական քարոզչությունը մեկնարկելու է սեպտեմբերի 9-ից մինչև սեպտեմբերի 30-ը: