Ձեր վստահելի աղբյուրը

Գյումրիում Ավետսիյանների ընտանիքի 7 անդամների սպանության գործով տուժողների իրավահաջորնդերի ներկայացուցիչ, փաստաբան Լուսինե Սահակյանի համար դժվար է հավատալ կատարված հանցագործությանը, որի համար դատավճռով ռուս զինծառայող Վալերի Պերմյակովը ցմահ ազատազրկման դատապարտվեց:

«Մի բան ակնհայտ է՝ շատ դժվար է հավատալ այս հանցագործությանը, դժվար է, որովհետև մենք նայում ենք սովորական, տրամաբանող մարդու աչքերով: Տրամաբանող մարդու համար դժվար է հավատալ, որ կարող ես մտնել ուրիշի տուն, հագուստ փոխել, գումար հայթայթել և հետո յոթ հոգու սպանել», -այսօր լրագրողների հետ հանդիպման ժամանակ ամփոփելով դատավաորությունը, հայտարարեց փաստաբան Լուսինե Սահակյանը:

Դատաբժշկական փորձաքննությամբ չի հիմնավորվել, որ Պերմյակովն անմեղսունակ է, ինչը հաստատվեց նաև դատաքննությունը, և տիկին Սահակյանի խոսքով, եթե փորձաքննությունը եզրակացներ, որ նա անմեղսունակ է, ռուս զինծառայողը կազատվեր պատժից:

«Երբ Պերմյակովը նամակ էր գրել հորը, ասել էր, որ դա իր միջի մարդն է արել: Այսինքն՝ մենք գործ ունենք հիվանդ մարդու հետ: Նորմալ մարդը չի կարող պատկերացնել՝ լավ եթե մեծահասկաներին սպանեցիր, որ չբացահայտվի քո հանցագործությունը, բա փոքրերին ինչո՞ւ սպանեցիր: Վեց ամսական երեխային ինչո՞ւ սպանեցիր, որը չէր կարող ոչինչ պատմել քո հանցագործության մասին: Այսինքն՝ մենք գործ ունենք հիվանդ մարդու հետ, ինքն էլ չգիտե, թե ինքն ինչ է արել»,- նկատեց փաստաբանը:

Այս պարագայում, ըստ Լուսինե Սահակյանի, պատասխանատվություն պետք է կրեին նաև նրան զորակոչող ու նրա ձեռքը զեն տվող անձինք:

«Այս գործի ամենալուրջ խնդիրն այն է, որ իրականում պատասխանատվության չենթարկվեցին այն առողջ մարդիկ, ովքեր հիվանդ մարդու ձեռքը զենք էին տվել: Սա է մեր ամբողջ խնդիրը: Եվ մենք պետք է ամեն ինչ անենք, որ Ռուսաստանի Դաշնությունը դա հասկանա», -նկատեց բանախոսը:

Այս գործով մյուս փաստաբան Արամազդ Կիվիրյանը, որը նույնպես տուժողի իրավահաջորնդերի ներկայացուցիչ էր, նշեց, որ պետք էր քննություն կատարել ու պարզել, թե ովքեր են Պերմյակովին զենք վստահած պաշտոնյաները: 

«Մեր խնդիրն էր նաև բացահայտել այն անձանց, ում պատասխանատվությամբ այս ամենը կատարվեց, որոնց անգործության արդյունքում կատարվեցին նման հանցագործություններ», -նշեց նա:

Անդրադառնալով այս գործով որպես բարոյական վնաս փոխհատուցում ՌԴ-ի դեմ ներկայացված քաղաքացիական հայցին, Կիվիրյանն ասաց, որ Շիրակի մարզի ընդհանուր իրավասության դատարանը սկզբում հայցը վարույթ ընդունեց, ճանաչեց տուժողների իրավահաջորդներին որպես քաղաքացիական հայցվոր, հետաձգեց նիստը մեկ ամսով, որ թարգմանի հայցը և ուղարկի ՌԴ, բայց մեկ ամիս անց որոշում կայացրեց, որ այդ հայցադիմումը հրաժարվում է վարույթ ընդունել:

«Անկախ ամեն նչից, երբ հայցը ընդունվում է դատարանի վարույթ, ապա պետք է քննության առարկա դարձներ ՌԴ կողմի մեղավորությունը, բայց դատարանը հրաժարվեց անել, և նման ընթացակարգ Հայաստանի օրենսդրության չկա», -հավելեց Կիվիրյանը՝ ընդգծելով, որ իրենք բողոքարկել են դատարանի այդ որոշումը, բայց Վերաքննիչ դատարանը այն թողել է առանց քննության:

Այդուհանդերձ, Ավետիսյանների սպանության գործով տուժողների իրավահաջորդների ներկայացուցիչները պայքարը կշարունակեն Վճռաբեկ դատարանում: