Ձեր վստահելի աղբյուրը

Լեռնային Ղարաբաղի Հանրապետության ներկայացրած սահմանադրական հայեցակարգը նման է ամերիկյան մոդելին՝ ժողովրդավարություն, որը հիմնված է նախագահի ինստիտուտի վրա:  Կառավարության նիստից հետո լրագրողների հետ ճեպազրույցում ասաց ՀՀ արտաքին գործերի նախարարի տեղակալ Շավարշ Քոչարյանը՝ պատասխանելով հարցին, թե Արցախն  ընտրել է «սուպերնախագահական» համակագը, արդյո՞ք այդ համակարգը շահեկան կլինի  ղարաբաղյան հիմնախնդրի կարգավորման առումով:

Փոխնախարարը չհամաձայնվեց «սուպերնախագահական» ձևակերպման հետ:

«Շատ անգամ՝ ասելով  նախագահական, միանգամից պատկերացնում են Ադրբեջանի տիպի պետություն: Իհարկե, դա այդպես չէ, որովհետև այն մոդելը, սահմանադրությունը, որ ընտրում է Ղարաբաղը, ավելի շատ նման է ամերիկյան մոդելին:  Կարծում եմ՝ այստեղ իր դերակատարումն է ունեցել այն հանգամանքը, որ դեռևս  հարցը վերջնական կարգավորված չէ, արտաքին վտանգի անմիջական գիտակցումը բուն Ղարաբաղում բերել է այդպիսի որոշման»,- ասաց Շ.Քոչարյանը:

Ինչ վերաբերում է դիտարկմանը, թե Հայաստանն ացնում կատարեց խորհրդարանականի, իսկ Արցախում նախագահական մոդելն են ընտրում,  փոխարտգործնախարարն ասաց. «Արցախում ընտրել են այդ մոդելը՝ ելնելով տարբեր հանգամանքներից, գործոններից: Պետք է ունենալ ազդեցիկ խորհրդարան, Արցախի խորհրդարանում այսօր 33 պատգամավոր է: Կարելի էր մեծացնել, բայց  կան բազմաթիվ հարցեր: Այստեղ կան մասնագիտական հանգամանքներ, որովհետև Հայաստանի ներքին պոտենցիալը, նույնիսկ մարդկանց թվաքանակը, մասնագետներն, այլ են, Ղարաբաղինն այլ է»:

Պատասխանելով հարցին, թե այսօր ԼՂ հիմնախնդրի կարգավորման գործընթացը ո՞ր փուլում է, Շ. Քոչարյանն ասաց, որ նախ և առաջ պետք է կատարվեն Վիեննայի, Սանկտ-Պետերբուրգի համաձայնությունները. «Առանց դրանց անիմաստ է խոսել առաջընթացի մասին»: