Ձեր վստահելի աղբյուրը

Համաշխարհային ճանաչում ունեցող  հին հռոմեական Կոլիզեումը չի տուժել Իտալիայում նախօրեին տեղի ունեցած երկրաշարժի հետևանքով: Այս մասին գրում է Ռիա նովոստին:

Իտալիայի մայրաքաղաքի պատմության և մշակույթի հուշարձանների  պահպանության գերատեսչության մասնագետները համալիր ուսումնասիրություն են անցկացրել անտիկ շինությունում և որևէ վնասված հատված չեն հայտնաբերել:

Մինչ այս տարբեր տարիներին տեղի ունեցած երկրաշարժերից հուշարձանը վնասներ կրել  է. մասնավորապես՝ 1349 թվականին տեղի ունեցած երկրաշարժը Հին Հռոմի ամենամեծ ամֆիթատրոնի  առաջին լուրջ ավերածության պատճառ էր դարձել: 1703-ին տեղի էր ունեցել 6,7 մագինտուդով երկրաշարժ, ավերվել էր Կոլիզեումի երեք կամար:

Հիշեցնենք՝ օգոստոսի 24-ին, ժամը 06.08-ին տեղեկություն է ստացվել, որ տեղական ժամանակով ժամը 05.36-ին (Գրինվիչի ժամանակով` 01.36-ին) գրանցվել էր 6.1 մագնիտուդով երկրաշարժ, որի էպիկենտրոնը գտնվում էր Իտալիայի տարածքում: Ստորգետնյա ցնցման ուժգնությունն էպիկենտրոնում կազմել էր 6-7 բալ: Երկրաշարժին հաջորդել էին ետցնցումներ` 5.4 և 4.9 մագնիտուդներով: Ավերածություններ արձանագրվել են երեք մարզում՝ Լացիո, Ումբրի և Մարկե: Երկրաշարժի հետևանքով զոհերի թիվը  հասել է 241-ի, 264 մարդ տուժել է, գտնվում է հիվանդանոցներում:

Իտալիայի մշակութային ժառանգության և մշակութային գործունեության նախարարությունը ստեղծել է ճգնաժամային հատուկ  խումբ ՝ ուսումնասիրելու երկրաշարժի հետևանքները: Մասնագետների տվյալներով, ստորգետնյա ցնցումները լուրջ վնասներ են հասցրել մշակութային և պատմական հուշարձաններին Ուրբինո, Նորչա, Մաչերատա, Տոլենտո, Կամերինո քաղաքներում: Բնականաբար, հուշարձաններն ամենաշատը վնասվել են Ամատրիչե և Ակկումոլի քաղաքներում: