Ձեր վստահելի աղբյուրը

Ռազմական կրթության ոլորտի բարեփոխումներն անմիջականորեն կապված են պաշտպանության ոլորտում տեղի ունեցող բարեփոխումների հետ: Այսօր լրագրողների հետ հանդիպմանը նման դիտարկում արեց ՀՀ ՊՆ կադրերի և ռազմական վարչության ՀՀ և արտասահմանյան երկրների ուսումնական հաստատություններում կադրերի պատրաստման բաժնի պետ, գնդապետ Սուրեն Դավթյանը:

Նրա տեղեկացմամբ՝ այս տարի ռազմամասնագիտական մասնագիտությունների գծով ուսումնառություն ստանալու նպատակով բուհեր են դիմել 118 դիմորդ, որից պիտանի է ճանաչվել 83-ը. «Տարեցտարի ավելանում է պաշտպանության նախարարության պատվերով ՀՀ տարբեր ուսումնական հաստատություններում պատրաստվող մասնագետների թիվը: Մենք մասնագետներ պատրաստում ենք ոչ միայն Հայաստանի ռազմական երկու բուհերում, այլև դաշնակից և գործընկեր երկրներում: Մեր երկրում հիմանակնում ընտրում են ՀՕՊ, կապավոր, հրաձիգ և մոտոհրաձիգ մասնագիտությունները»:

Գնդապետը նշեց նաև, որ ռազմական մասնագիտություններ ընտրող աղջիկների թիվը ևս ավելացել է: Այս տարի Վազգեն Սարգսյանի անվան ռազմական համալսարան ընդունվել է 11 իգական սեռի ներկայացուցիչ:

ՀՀ ՊՆ Մարշալ Արմենակ Խանփերյանցի անվան ռազմական ավիացիոն համալսարանի ուսումնական և գիտական աշխատանքների գծով պետի տեղակալ գնդապետ Դավիթ Ալեքսանյանն էլ նշեց, որ իրենց ուսումնական հաստատություն է դիմել 160 դիմորդ, որոնց քանակը բժշկական հետազոտության արդյուքում կրճատվել է. «Այս տարի Խանփերյանցի անվան ռազմական համալսարան է դիմել 4 իգական սեռի ներկայացուցիչ»:

Բանախոսները նշեցին, որ այլ բուհեր ավարտած շրջանավարտները մասնագիտության համապատասխանության դեպքում կարող են մեկամյա սպայական ունկնդրում անցնել, այնինքն եթե նրանք տեխնիկական կրթություն ունեն ֆիզիկա և բարձրագույն մաթեմատիկա առարկաներից:

Լրագրողները հետաքրքրվեցին, թե ապրիլյան պատերազմից հետո ՀՀ տարբեր ռազմական ուսումնական հաստատություններ դիմողների թիվը ինչ փոփոխության է ենթարկվել, որի ի պատասախան գնդապետ Սուրեն Դավթյանը ասաց, որ գրեթե պահպանվել է նախորդ տարիների ցուցանիշը: