Ձեր վստահելի աղբյուրը

Հալեպահայ Թալին Գեսթարիլիկյանը, ամուսինը, որդին և դուստրը մեկուկես ամիս առաջ են եկել Հայաստան: Բնակվում են Երևանում, Տիգրան Մեծ փողոցում տուն են վարձակալել:  Panorama.am-ի հետ զրույցում տիկին Թալինն ասաց, որ դիմել են սփյուռքի նախարարությանը, որևէ օգնություն չեն ստացել: Բայց արդեն 2-3 շաբաթ ռեստորանում է աշխատում, տղան էլ վերանորոգում է ավտոմեքենաներ: Ամուսինն ու 19-ամյա դուստրը դեռ աշխատանք չունեն:

Նա պատմեց, որ Հալեպում այն օրը, երբ աղջիկը պետք է գնար քննություններ հանձնելու, «անձրևի նման հրթիռներ էին ընկնում», իրենք թույլ չեն տվել, որ դուրս գա տանից:

«Հինգ տարի սպասում էինք, հույս ունեինք, որ մեր կառավարությունը կհաղթի: Հինգ տարի համբերեցինք, բայց տեսանք, որ պատերազմը վերջ չունի: Վատ, վախեցած օրեր ենք անցկացրել, հիվանդանոց պառկել: Ես շատ վատ հոգեվիճակում էի: Որոշեցինք, որ պետք է գանք Հայաստան: Պարտք վերցրեցինք ու եկանք»,- պատերազմական հինգ տարին ու իրենց անցած ճանապարհը հակիրճ այսպես ներկայացրեց տիկին Թալինը: 

Նա նշեց, որ այսօր Հալեպում ունեն ընկերներ, բարեկամներ, ովքեր նույնպես ուզում են գալ Հայաստան, սակայն  գումար չունեն, նաև՝ չունեն աշխատանք, ամեն ինչ շատ թանկ է Հալեպում:
 
Օրերս տիկին Թալինն իր պատրաստած քաղցրավենիքը ներկայացրել է Վերնիսաժում բացված ցուցահանդես-վաճառքում: Ներկայացված ձեռագործ իրերի կողքին  հալեպահայ տիկնոջ պատրաստած և ներկայացրած բլիթները, խմորեղենը տարածել էին անուշ հոտ: Հնարավոր չէր անցնել ու չկանգնել տիկին Թալինի տաղավարի մոտ:

«Հալեպում հագուստ եմ վաճառել: Իմ տանն էի վաճառում, հաճախորդներ ունի: Միշտ էլ սիրել եմ պատրասել տորթ, խմորեղեն: Երեկ ներկայացրեցի իմ պատրաստած անուշեղենը: Գոհ եմ, լավ վաճառվեց: Մի մարդ մոտեցավ և առաջարկեց՝ աշխատել իր ռեստորանում: Չպատասխանեցի այդ ժամանակ: Բայց լավ կլինի, որ երկրորդ աշխատանքն էլ ունենամ:  Շատ լավ է նման ցուցահանդեսները, եթե նորից լինեն՝ էլի կմասնակցեմ»,- ասաց հալեպահայ Թալին Գեսթարիլիկյանը:

Լուսանկարները՝ Հելենա Մելքոնյանի ֆեյսբուքյան էջից: