Ձեր վստահելի աղբյուրը

Գյումրիում և Վանաձորում համայնքի ավագանու ընտրություններին կուսակցությունների և կուսակցությունների դաշինքների առաջադրումների ժամկետն ավարտվել է և սկսվել է նրանց գրանցումը: Կենտրոնական ընտրականա հանձնաժողովի նախագահ Տիգրան Մուկուչյանը Panorama.am-ին տեղեկացրեց, որ ընտրություններին ընդառաջ այս համայնքներում ակտիվությունը բավական բարձր է:

Այսպես, ըստ պարոն Մուկուչյանի ներկայացրած տվյալների, Գյումրիում ավագանու ընտրություններին մասնակցելու համար առաջադրվել է 11 կուսակցություն, որից մեկը կուսակցությունների դաշինք է, իսկ Վանաձորում՝ 8:

Մինչև սեպտեմբերի 2-ը կուսակցությունների գրացնամն ժամկետն է, որի ընթացքում կուսումնասիրվեն ներկայացված փաստաթղթերը և, Մուկուչյանի փոխանցմամբ, սահմանված կարգով ու ժամկետներում գրանցման որոշումներ կկայացավեն:

«Բավականին մեծ է ակտիվությունը այս երկու համայնքներում կայանալիք ավագանու ընտրություններում, ինչը խոսում է այն մասին, որ թե Վանաձորում, թե Գյումրիում կայանալիք տեղական ինքնակառավարման մարմինների ընտրություններում ակտիվ կուսակցական մասնակցություն է լինելու: Թվով շատ կուսակցությունների մասնակցությունը այդ համայնքներում խոսում է ակտիվ ընտրապայքարի մասին»,-հավելեց պարոն Մուկուչյանը:

Այսպես, Գյումրիում ավագանու ընտրություններին մասնակցելու համար փաստաթղթեր են ներկայացրել «Ալյանս» կուսակցությունը՝ ավագանու 23 թեկնածուի ցուցակով, որը գլխավորում է Արմեն Բադալյանը, «Քաղաքացիական պայմանագիրը»՝ 17 թեկնածու՝ Արթուր Համբարձումյանի գլխավորությամբ, ԲՀԿ-ն 49 թեկնածու՝ Վարդևան Գրիգորյանի գլխավորությամբ, «Գյումրեցու ոգին»՝ 16 թեկնածու Արմեն Ներսիսյանի գլխավորությամբ, ԳԱԼԱ-ն՝ 24 թեկնածու Վահան Խաչատրյանի գլխավորությամբ, ՀՅԴ-ն՝ 33 թեկնածու Աշոտ Կուրղինյանի գլխավորությամբ, «Հայկական վերածնունդը» 90 թեկնածու Հովհաննես Մարգարյանի գլխավորությամբ, ՀԱԿ-ը՝ 22 թեկնածու Եպրաքսիա Սիմոնյանի գլխավորությամբ, «Գործարար» կուսակցությունը՝ 16 թեկնածու Գեղամ Բաղդասարյանի գլխավորությամբ, «Համախմբում» կուսակցությունը՝ 33 թեկնածու Հովհաննես Ասոյանի գլխավորությամբ:

Դաշինքով ընտրություններին մասնակցում է Հանրապետական-ՔԴԿ դաշինքը, որն ընտրություններին հանդես է գալու «Բալասանյան» անունով:

Իսկ Վանաձորում պատկերն այսպիսին է՝ «Բարգավաճ Հայաստան» կուսակցությունը ներկայացրել է ցուցակ 28 թեկնածուով, որը կգլխավորի Այծեմնիկ Օհանյանը, Լուսավոր Հայաստան կուսակցությունը ներկայացրել է ցուցակ 35 թեկնածուից կազմված, որը գլխավորելու է ԱԺ պատգամավոր Էդմոն Մարուքյանի եղբայրը՝ Քրիստ Մարուքյանը: Համախմբում կուսակցության ցուցակը կգլխավորի Վահան Ղույումչյանը (33 թեկնածու), Հայ Ազգային կոնգրես կուսակցության համամասնական ցուցակը կգլխավորի Ռուբեն Ոսկանյանը (33 թեկնածու), ՀՅԴ-ն՝ Նելսոն Մամուլյանը (38 թեկնածու), ՀՀԿ-ն՝ Մամիկոն Ասլանյանը (68 թեկնածու), Հայկական Վերածնունդ կուսակցությունը ներկայացրել է 70 թեկնածուով կազմված համամասնական ցուցակ, որը գլխավորելու Արկադի Փելեշյանը: Եվ Քաղաքացիական պայմանագիր կուսակցության ցուցակը կգխավորի Արամ Խաչատրյանը (21 թեկնածու):