Ձեր վստահելի աղբյուրը

Այսօր Երևանից Մոսկվա մեկնած ՌԴ քաղաքացի Սերգեյ Միրոնովը, որը Հայաստանի դատարանի որոշմամբ ազատվել էր կալանքից, հայտարարել է, թե Հայաստանի իշխանությունների ներկայացուցիչները իրեն վերաբերվել են որպես հյուր և իր նկատմամբ ճնշում չեն գործադրել, գրում է «РИА Новости» գործակալությունը:

«Հայաստանի իշխանությունների վերաբերմունքը միայն լավ տպավորություն է թողել: Ըստ էության, նրանք ինձ վերաբերվել են ինչպես հյուրի: Հասկանալի է, որ ստեղծված իրավիճակի պատճառով եղել են որոշակի սահմանափակումներ, բայց ընդհանուր առմամբ ամեն ինչ լավ է եղել, ոչ մի ճնշում չի գործադրվել», -հայտարարել է Միրոնովը:

Նա նաև հայտարարել է, որ դատական գործընթացներից չի վախենում, սակայն առաջիկայում չի ծրագրում մեկնել Ռուսաստանից:

Ըստ աղբյուրի, Միրոնովը և իր փաստաբանները փորձում են այս օրերին հասկանալ, արդյոք ՀՀ Գլխավոր դատախազությունը բողոքարկելո՞ւ է կալանք չկիրառելու մասին դատարանի որոշումը:

ՌԴ քաղաքացի, 30-ամյա Սերգեյ Միրոնովը 2016 թ. մայիսի 11-ից միջազգային մակարդակով հետախուզվում է ԱՄՆ իրավապահ մարմինների կողմից: Ըստ աղբյուրի, հետախուզվողը մեղադրվում է ԱՄՆ քրեական օրենսգրքի 18-րդ գլխի 371-րդ և 3155-րդ հոդ. /զենքի արտահանման վերահսկման օրենքը խախտելու նախնական համաձայնություն/, 22-րդ գլխի 2778-րդ «b» կետի 2-րդ մասի և «c» կետի, 18-րդ գլխի 2-րդ և 3551-րդ հոդ. /զենքի արտահանման վերահսկման մասին օրենքի խախտման փորձ/, 18-րդ գլխի 1956-րդ հոդ. «h» և «a» կետերի և 3551-րդ հոդ. /փողերի լվացման նախնական համաձայնություն/, 18-րդ գլխի 1956-րդ հոդ. «a» կետի 2-րդ մասի և 3551-րդ հոդ /փողերի լվացում/ հատկանիշներով նախատեսված հանցագործություն կատարելու համար:

Միրոնովը Հայաստանի «Զվարթնոց» օդանավակայանում հայտնաբերվել էր իրավապահների կողմից, և դատախազությունը միջնորդել էր ժամանակավոր կալանք կիրառել Միրոնովի նկատմամբ: Սակայն Կենտրոն և Նորք Մարաշ վարչական շրջանների ընդհանուր իրավասության դատարանը մերժել էր միջնորդությունը, և Միրոնովը մեկնել էր Հայաստանից: