Ձեր վստահելի աղբյուրը

Սեպտեմբերի 1-ին դպրոցական զանգ չի հնչել Վայոց ձորի Աղավնաձոր գյուղում:  Գյուղացիները երեխաներին դպրոց չեն ուղարկել ի նշան բողոքի. պատճառն այն է, որ դեռևս նախորդ տարի մթերված խաղողի գումարները «Վեդի Ալկո» ընկերությունը չի վճարել գյուղացիներին:

Ինչպես Panorama.am-ի զրույցում ասաց Աղավնաձոր համայնքի ղեկավար Աշոտ Գալստյանը,  գյուղացիները երեխաներին սեպտեմբերի 1-ին չեն ուղարկել դպրոց , քանի որ նրանք գումար չունեն, որ իրենց երեխաների համար հագուստ, գրենական պիտույքներ գնեն:

«Բոլորն էլ ուզում են, որ իրենց երեխաներին նորմալ դպրոց ուղարկեն, բայց ինչպես, եթե հագուստ, կոշիկ, գիրք ու տետր չեն առել»,- ասաց գյուղապետը:

Նրա խոսքերով՝ գյուղացիներն այսօր ուսուցիչներին շնորհավորել են ու ասել, թե ինչի համար դպրոց չեն ուղարկել: 

Աշոտ Գալստյանը նշեց, որ  Աղավնաձոր համայնքին «Վեդի Ալկո» ընկերությունը պարտք է շուրջ 140 միլիոն դրամ: «Անցած տարի հոկտեմբերին ենք խաղողը հանձնել, մինչև հիմա գումար չեն տվել: Ընկերությունը գումար չունի, որ վճարի: Հիմա էդ մարդը չի կարողանում վճարել, բոլոր ատյաններն էլ գիտեն այդ մասին»,- նշեց համայնքի ղեկավարը:

Նա միաժամանակ ասաց, որ համապատասխան  պաշտոնյաններն այդ մասին տեղյակ են, եկել են գյուղ, գիտեն, թե ինչ խնդիր կա:

Աշոտ Գալստանի խոսքերով՝ հայտնի չէ, թե երբ երեխաներին դպրոց կուղարկեն: «Ոնց կարող ա մարդը սոված երեխային դպրոց ուղարկի: Տեսնենք, թե ինչ կլինի: Էդ մարդիկ իրենց արդար քրտինքի փողն են ուզում»,- նշեց Աղավնաձոր համայնքի ղեկավարը: