Ձեր վստահելի աղբյուրը

ՀՀ նախագահական նստավայրում տարբեր մրցույթներում, օլիմպիադաներում մրցանակների արժանացած և 2015-2016 թթ. ուսումնական տարվա ՀՀ հանրակրթական ուսումնական հաստատություններում մեդալակիր շրջանավարտների հետ հանդիպման ժամանակ Սյունիքի մարզի Ակների միջնակարգ դպրոցի շրջանավարտ (մեդալակիր) Սոնա Սահակյանն առաջարկով դիմեց նախագահ Սերժ Սարգսյանին:

«Ես Ձեզ առաջարկություն ունեմ և շատ ուրախ կլինեմ, եթե ընդունեք: Ես առաջարկում եմ Ձեզ, որ վճարեք իմ ուսման վարձը: Հետագայում, եթե լավ առաջադիմություն չցուցաբերեմ և մեր երկրի համար իմ մասնագիտության ասպարեզում առաջնակարգ մասնագետ չդառնամ, ես կվերադարձնեմ Ձեր գումարը: Խոստանում եմ»,- ասաց Սոնա Սահակյանը:

Սոնայի առաջարկը ծափարահությունների արժանացավ: 

Նախագահը նախ նշեց, որ խոստումը լավագույն երաշխիքն է, ապա հավելեց, որ կրթության և գիտության նախարար Լևոն Մկրտչյանը գրանցեց և իրենք կանդրադառնան այդ հարցին:

«Ես իմ խոստման տերը կլինեմ»,- ասաց Սոնան:

Սոնա Սահակյանն ընդունվել է ԵՊՀ Ինֆորմատիկայի և կիրառական մաթեմատիկայի ֆակուլտետը: Ուսման վարձը տարեկան 540 հազար դրամ է:

Հանդիպման ընթացքում նաև այլ հարցեր հնչեցին, մասնավորապես՝ հնարավո՞ր է մեդալակիր աշակերտներին, ովքեր ընդունվել են բուհ՝ վճարովի, որևէ արտոնություն տրվի կամ զեղչային համակարգ կիրառվի:

«Խնդիրները կրթության և գիտության նախարարը կնայի, կտեսնենք՝ խոսքն ինչի մասին է, անպայման որևէ միջամտություն կլինի, խնդիրը կլուծվի: Կարևորը, որ ապագայում լավ մասնագետներ և քաղաքացիներ դառնաք»,- ասաց նախագահ Սերժ Սարգսյանը: 

Աշակերտներից մեկն էլ ցանկացավ իր հարցը չբարձաձայնել. «Պարոն նախագահ, կարո՞ղ եմ Ձեզ մի բան խնդրել:  Կարելի՞ է Ձեր ականջին ասել»: 

Սերժ Սարգսյանը լսեց նրան: