Ձեր վստահելի աղբյուրը

Երևանի Խաչիկ Դաշտենցի անվան թիվ 114 ավագ դպրոցում ուսումնական տարին մեկնարկեց մեկ րոպե լռությամբ՝  հարգելով ապրիլյան պատերազմի հերոս Ադամ Սահակյանի հիշատակը: Դպրոցում հերոսի անվան դասասենյակ բացվեց, ներկա էին կրթության և գիտության նախարար Լևոն Մկրտչյանը, Ադամ Սահակյանի ծնողները, ուսուցչական կազմը, աշակերտները:

««Ադամ Սահակյան, ներկա»: Այս խորագիրն ենք ընտրել՝  ցանկանալով, որ  Ադամ Սահակյանը միշտ ներկա լինի և իր դպրոցում, և իր տանը, և իր երկրում, և իր հողի վրա: Սա ձեզ պատգամ, սիրելի աշակերտներ, միշտ բարձր պետք է պահեք Ադամի պատիվը»,- ասաց դպրոցի տնօրեն Ռուզաննա Կոստանյանը:

Կրթության և գիտության նախարար Լևոն Մկրտչյանի խոսքով, հերոսն առանձնաշնորհյալ բան չէ, հերոսը մեր կողքին ապրող երիտասարդն է, ով ինչ-որ մի պահի կատարում է իր պարտականությունները:

Ադամ Սահակյանի մայրը՝ Գոհար Անտոնյանը, հիշեց, երբ Ադամին ճանապարհում էին բանակ, հուզմունք կար, մի փոքր տագնապ, բայց նաև` հպարտություն:

«Մեծ հպարտություն եմ զգում:  Ոչ բոլորին է բախտ վիճակվում այդքան երիտասարդ տարիքում կատարել իր միսիան։ Երբևէ չեմ դատապարտում նրան՝ անձնազոհության համար: Ես Ադամին ընդունում եմ այնպես, ինչպես կար, հպարտանում եմ: Ամեն մարդու չի վիճակված լինել այդքան երիտասարդ և նման բնավորություն ունենալ։ Տղաս մեր առասպելական հերոսներին շատ էր սիրում»,- ասաց Ադամի մայրը:

Հերոսի անունը կրող դասասենյակում կախված էին նրա լուսանկարները, «Ադամ Սահակյան, ներկա» գրությամբ ցուցանակ:

20-ամյա Ադամ Սահակյանը զոհվել է այս տարվա ապրիլյան քառօրյա պատերազմի ընթացքում:  Ապրիլի 13-ին տեղի է ունեցել Ադամ Սահակյանի հուղարկավորությունը Եռաբլուր զինվորական պանթեոնում:

2016 թվականի ապրիլի 10-ին Ադամ Սահակյանը ԼՂՀ նախագահ Բակո Սահակյանի կողմից պարգևատրվել է Լեռնային Ղարաբաղի Հանրապետության «Մարտական ծառայություն» պետական մեդալով։ 2016 թվականի մայիսի 28-ին Ադամը ՀՀ նախագահ Սերժ Սարգսյանի կողմից պարգևատրվել է Հայաստանի Հանրապետության «Արիության» պետական մեդալով։