Ձեր վստահելի աղբյուրը

Ռիոյի Օլիմպիադայից մեդալներով վերադարձած Հայաստանի ծանրամարտի հավաքականի անդամներ Սիմոն Մարտիրոսյանն ու Գոռ Մինասյանը՝ գլխավոր մարզիչ Փաշիկ Ալավերդյանի ուղեկցությամբ, «Sputnik Արմենիա» մամուլի կենտրոնում այսօր հանդիպեցին լրագրողների հետ: Բրազիլիայի սրտում 2 արծաթե մեդալ նվաճած մեր ծանրորդների տպավորությունները վառ էին, ոգևորությունը՝ մեծ:

Գլխավոր մարզիչ Փաշիկ Ալավերդյանը մտահոգված էր, որ մրցումների մեկնարկին բարոյահոգեբանական առումով կարող էր խանգարել Անդրանիկ Կարապետյանի վնասվածքը, բայց, հուրախություն բոլորիս, մյուս տղաներն իրենց մեջ կարողացան ուժ գտնել և բարձր մակարդակով հանդես գալ:

«Տղաները կարողացան միասնական լինել, իրենց մեջ ուժ գտնել, դառնալ մի բռունցք և անել այն, ինչին ականատես եղանք: Նրանք արեցին այն, ինչին պատրաստ էին»,- ասաց Ալավերդյանը:

Սիմոն Մարտիրոսյանը ևս հպարտ է, որ իր հայրենիքի և իր ընտանիքի համար կարողացել է մեդալ նվաճել:
«Թե Երևանում, թե Էջմիածնում ինձ հիանալի դիմավորեցին: Իմ քաղաքում ինձ հանձնեցին «Էջմիածնի բարեկամ» մեդալ, ինչի համար շնորհակալ եմ և ուրախ»,- ասաց Մարտիրոսյանն ավելացնելով՝ որ նման արդյունքը պարտավորեցնող է, սակայն պետք է առաջ նայել ու մտածել ավելին անելու, ավելի բարձր արդյունքներ գրանցելու մասին:

Գոռ Մինասյանը ևս կիսվեց տպավորություններով, ինչպես նաև անդրադարձավ այն թեմային, թե ընդունելո՞ւ է արդյոք ՀԱՕԿ-ի նախագահ Գագիկ Ծառուկյանի կողմից իրեն տրամադրված նվեր-բնակարանը, քանի որ իր հարցազրույցներում Գոռը բազմաթիվ անգամներ նշել է, որ բարեգործություն կամ նվերներ չի ընդունում:

«Շատ լավ ու վառ տպավորություններ ունեմ: Բավական երկար էինք նախապատրաստվել այս մրցումներին, երկար էինք աշխատել և, կարծում եմ, արդարացրեցինք բոլորի սպասումները: Ուրախ ենք, որ մեր երկրի համար դրոշ ենք բարձրացրեցինք, ամբողջ աշխարհը տեսավ, որ Հայաստանի պես փոքր երկիրը կարողացավ այսպիսի արդյունք գրանցել:

Ինչ վերաբերվում է բնակարանին, ապա այն ոչ բարեգործություն է, ոչ էլ նվեր: Ես դա վաստակել եմ: Քիչ բան չեմ արել իմ երկրի համար, և ինձ թվում է, որ արժանի եմ: Սա նվեր չէ, այլ իմ արդյունքին հմապատասխան պարգև»,- ասաց Գոռ Մինասյանը: