Ձեր վստահելի աղբյուրը

««Երկրաշարժ» ֆիլմը հայ ժողովրդի խայտառակությունն է: Նույնիսկ այն ուղղումները, որոնք մեր քննադատությունից հետո արվեց, ֆիլմը չի փրկում»,- Հայկական ազգային կինոակադեմիայի նիստից հետո լրագրողների հետ զրույցում ասաց կինոակադեմիայի անդամ, Հայաստանի Կինեմատոգրաֆիստների միության նախագահ, ՀՀ ժողովրդական արտիստ Ռուբեն Գևորգյանցը:

Հիշեցնենք, որ նիստում կինոակադեմիայի անդամների փակ քվեարկության արդյունքում որոշվեց, որ «Օսկար» մրցանակաբաշխության «Լավագույն օտարալեզու ֆիլմ» անվանկարգում ներկայացվելու է Սարիկ Անդրեասյանի «Երկրաշարժ»   ֆիլմը: Կինոակադեմիան ստացել  էր երեք ֆիլմի հայտ՝ Դավիթ Սաֆարյանի «Տաք երկիր, ցուրտ ձմեռ», Սարիկ Անդրեասյանի «Երկրաշարժ» և Ջիվան Ավետիսյանի «Վերջին բնակիչը»:

Ռ. Գևորգյանցի խոսքով, «Երկրաշարժը» հակահայկական ֆիլմ է. «Այն ցույց է տալիս դեբիլ հայ ժողովրդին, ով երկրաշարժի ժամանակ տեսնում է  հենց այս վայրկյանին մահացած մարդ ու ձեռքից հանում ժամացույց: Պատկերացնում եք՝ ամբողջ ֆիլմն այդպես է: Եվ երկու վեհ ռուս մարդու կերպար, ովքեր փրկում են ընդհանրապես հայերին, ամենալավ մարդիկ են: Մնացած բաները չեմ ասում: Տեխնիկապես շատ լավ է  արված, բայց հակահայկական ֆիլմ է»:

Նրա գնահատմամբ, «Վերջին բնակիչը» նույնպես հակահայկական ֆիլմ է:

«Ահավոր ֆիլմ է, սյուժեն անհեթեթություն է: Մի հայ մարդու և ադրբեջանցու մասին է: Եթե ռեժիսորը վերցնում է թուրքի դերում խաղացնում է  պարսիկ դերասանի, ով արիացի է, խելոք տեսք ունի, արդեն կասեմ դիվերսիա է երևի»,- ասաց Ռ. Գևորգյանցը:

Ըստ նրա, երեք ֆիլմերից  կինոյին մի քիչ մոտ էր Դավիթ Սաֆարյանի «Տաք երկիր, ցուրտ ձմեռ»-ը, «բայց «էլի «Օսկար»-ի բան չէր»:

Հարցին, թե այսօր ունե՞ք որևէ ֆիլմ, որ կարող եք «Օսկար»-ի ներկայացնել, Ռ.Գևորգյանցն ասաց. «Իհարկե, ոչ»:

Կինոակադեմիայի անդամ, դերասան, սցենարիստ, ռեժիսոր, ՀՀ ժողովրդական արտիստ Միքայել Պողոսյանն ասաց, որ «Օսկար»-ի ներկայացնելու երեք ֆիլմից ամենաարժանին  Դավիթ Սաֆարյանի «Տաք երկիր, ցուրտ ձմեռ»-ն էր:

«Երկրորդ փուլի դեպքում (անցել էին «Երկրաշարժ» և «Վերջին բնակիչը» ֆիլմերը) պետք է անցներ «Երկրաշարժ»-ը, քանի որ երրորդ ֆիլմն ինձ համար անընդունելի է: Այն լոբբինգը և տարափը, որ սկսվեց այս ֆիլմի շուրջ, բացարձակ անընդունելի է ինձ համար: Այդպես ոչ մի հարց չի կարելի լուծել: Ուղղակի խորհրդի կերպով եմ ասում: «Վերջին բնակիչը» ֆիլմն ինձ դուր չի եկել: Այն չի համապատասխանում ոչ սցենարին, ոչ երաժշտական, ոչ դերասանական չափանիշներին, որոնք ինձ համար ընդունելի են»,- ասաց Մ. Պողոսյանը:

Նա «Երկրաշարժ» ֆիլմին ցանկացավ հասնել ինչ-որ բարձունքների ոչ միայն «Օսկար»-ի հետ կապված, այլ առաջին հերթին կպչի հանդիսատեսի մտքին, սրտին:

Նշենք, որ «Երկրաշարժ» ֆիլմում նկարահանվել է նաև Միքայել Պողոսյանը:

Կինոակադեմիայի անդամ, կինոգետ Սիրանույշ Գալստյանը քվեարկել է այն տեսանկյունից, որ Հայաստանը «Օսկար»-ի ընդհանուր պրոցեսի շրջանառության մեջ լինի:

«Ինձ համար սկզբունքորեն դա էր կարևոր՝ անկախ այն բանից, թե վերջնական քվեարկության դրված ֆիլմերն իմ ճաշակով են, թե ոչ, պրոֆեսիոնալ տեսանկյունից ինչքանով են ընդունելի կամ  անընդունելի»,- ասաց կինոգետը:

Նա նշեց, որ ներկայացված ֆիլմերի մեջ ընտրելի էր Դավիթ Սաֆարյանի «Տաք երկիր, ցուրտ ձմեռ» -ը:

Ս.Գալստյանն ասաց, որ գեղարվեստական, կերպարային ընդհանրացումներ է ուզում տեսնել ֆիլմերում, որոնք հայկական կինոյում շատ վաղուց գրեթե վերացել են:

Կինոակադեմիայի նախագահ, ռեժիսոր, ՀՀ ժողովրդական արտիստ Հարություն Խաչատրյանն ասաց, որ կարող էին խիստ լինել՝ ընտրել աշխարհում լավագույնը, որ միայն հաղթի:

«Մենք վաղուց դուրս ենք մնացել կինոակադեմիաների  պրոեկտներից, հայկական կինո գրեթե գոյություն չունի կինոակադեմիաների ցանկերի մեջ: Հայաստան անունը ջնջվել էր «Օսկար»-ի ցանկերից, որն ամենամեծ խայտառակությունն էր»,- ասաց նա՝ միաժամանակ հավելելով, որ պետք է հստակեցվեն, մանրամասնվեն բոլոր չափանիշները:

Ըստ նրա, «Օսկար»-ի գնում են սովորաբար այն ֆիլմերը, որոնք տարբեր փառատոների են մասնակցած լինում ու ունենում են գլխավոր մրցանակներ, իսկ այս ֆիլմերի դեպքում դրանք չկային:

Քվեարկության ժամանակ Հ. Խաչատրյանն ասել էր, պետք է գոնե մեկ ֆիլմ ընտրեն, որպեսզի  մասնակից դառնան ինչ-որ պրոցեսների: