Ձեր վստահելի աղբյուրը

Միհրան  Հարությունյանի եզրափակիչ գոտեմարտը լկտի, անբարո ձևով անցավ, այլ բառեր չեմ գտնում: Այսօր նման գնահատական տվեց Հայաստանի Ազգային Օլիմպիական կոմիտեի գլխավոր քարտուղար Հրաչյա Ռոստոմյանը:

«Այս պահին մեր միտքը մեր մեդալը վերադարձնելն է: Դա ոչ թե Միհրանին է, իմը կամ ձերը, այլ ողջ ժողովրդինն է: Մրցավարին աստված կպատժի»,-ասաց ՀԱՕԿ քարտուղարը՝ նշելով, որ իրենց բողոքարկման հիմնական նպատակը ոչ թե մրցավարին պատժելն է, այլ ոսկի մեդալն իրական հասցեատիրոջը վերադարձնելը:

«Մենք միջազգային իրավաբաններ ենք վարձել, ովքեր աշխատում ենք այդ ուղղությամբ: Բոլորս ուզում ենք մեդալը վերադարձնել»,-լրագրողների հետ հանդիպմանն ասաց նա:

Նա հիշեցրեց, որ ԱՄՆ-ում անցկացված աշխարհի առաջնության խաղերի ժամանակ Միհրան Հարությունյանի մրցելույթի չորս մրցավարների հեռացրել են աշխատանքից:

«Մենք հույս ունեինք, որ դա կնպաստի մրցավարների զգուշությանը, բայց ցավոք սրտի, հասկացանք, որ մրցավարներն ուղղակի կամակատար են»,-ասաց նա, չմանրամասնելով, թե ում մասին է խոսքը:

Հ. Ռոստոմյանը նշեց, որ հաղթանակի հասած բոլոր մարզիկները կպարգևատրվեն:

«Կան անակնկալներ՝ պարոն Ծառուկյանն առատաձեռն է: Ամեն ինչ հայտնի կդառնա սեպտեմբերի 18-ին»,-ասաց նա:

Անդրադառնալով հարցին, թե Գյումրիի մարզադպրոցի վիճակի բարելավման ուղղությամբ ի՞նչ քայլեր են ձեռնարկվելու, Ռոստոմյանն ասաց, մարզադպրոցը գտնվում է  տեղական ինքնակառավարման մարմիններ տնօրինության ներքո:

«Ինչ վերաբերում է ՀԱՕԿ-ին, ապա մենք Գյումրիում գերժամանակակից  7500 քմ մակերեսով մարզակենտրոն ենք կառուցում, որտեղ լինելու են ըմբշամարտի, ծանրամարտի, բռցքամարտի, ձյուդոյի, սամբոյի կենտրոններ, հյուրանոցային սենյակներ, ճաշարան: Բոլորը ֆինանսավորվում է Գագիկ Ծառուկյանի կողմից: Մնում է ներքին հարդարման աշխատանքները, հույս ունենք կենտրոնը հաջորդ տարի հանձնել Գյումրի քաղաքին»,-ասաց նա: